Bandièra01 1180x150: Comuna de Tolosa

Actualitats

La catedrala de Nòstra Dòna de París èra ja a mand de tombar abans l’incendi

En 2017, l’archevescat de París getèt un crit d’alarma

| EPA

Lo montant dels trabalhs deviá aténher 150 milions d’èuros sus 30 ans mas l’estat francés i contribuiguèt pas. Après l’incendi, qualques rics òmes e societats de França an anonciat de dons generoses per la reconstruccion del santuari. Tolosa donarà un milion d’èuros.


La catedrala de Nòstra Dòna de París èra ja a mand de tombar. En 2017, l’archevescat de París getèt un crit d’alarma. Avián de besonh de 100 milions d’èuros per salvar la catedrala de la roïna mas l’estat francés i contribuiguèt pas. Alavetz, cerquèron de mecènas, dont una partida als Estats Units, per finançar los trabalhs que comencèron l’estiu passat.
 
Lo montant d’aqueles trabalhs deviá aténher 150 milions d’èuros sus 30 ans. Avián començat fa qualques meses per la poncha que tombèt diluns. Las estatuas devián èsser desmontadas e caliá recuperar las relíquias de Santa Genevièva que se trobavan a la cima. En mai d’aquò, las gargolhas èran parcialament esfondradas, los arcs que sostenián la vòuta flaquejavan e qualques murs èran fendilhats.


De dons milionaris e de patriotisme francés après l’incendi

Lo president francés, Emmanuel Macron, anoncièt diluns passat una campanha de soscripcion estatala (a dich “nacionala”) per collectar d’argent e tornar bastir la catedrala de París, après que foguèt degalhada per un grèu incendi. Lo fuòc destruguèt la poncha centrala e dos tèrces de la vòuta. La consolessa màger de París, Anne Hidalgo, prepausèt sus France Inter d’organizar una “conferéncia internacionala de donadors” per aculhir d’expèrts e amassar de fonzes.
 
 
“Simbòl de l’unitat francesa”
 
Ièr dimars, qualques oras après l’incendi, qualques òmes rics de França anoncièron de dons generoses per la reconstruccion. François-Henri Pinault e son paire, colleccionaires d’art e proprietaris de las marcas de luxe Kering, declarèron que farián un don de 100 milions d’èuros.
 
Tanben la familha Arnault e lo grop d’entrepresas Louis Vuitton Moët Hennessy anoncièron de dons de 200 milions d’èuros: “Ajudarem a rebastir aquela catedrala extraordinària, qu’es un simbòl de França, de son eiretatge e de l’unitat francesa”, çò diguèron dins un comunicat.
 
Aquel messatge seguís la proclamacion nacionalista que la faguèt Macron après la catastròfa. “Tornarem bastir Nòstra Dòna totes ensems”, çò diguèt lo president de França en soslinhant que lo santuari “es [lor] istòria, [lor] literatura, [lor] imaginari, lo luòc ont [visquèron] [lors] grands moments, [lors] epidemias, [lors] guèrras, [lors] liberacions, es tant de libres e de pinturas”.
 

La region aduirà 10 milions d’èuros d’argent public
 
De son caire, la presidenta de la region Illa de França, Valérie Pécresse, a anonciat 10 milions d’èuros d’argent public coma “ajuda d’urgéncia per ajudar l’arquevescat a far los primièrs trabalhs” de reconstruccion.


La comuna de Tolosa dona 1 milion
 
Lo cònsol màger de Tolosa, Jean-Luc Moudenc, qu’es tanben lo president de Tolosa Metropòli, a anonciat que se donariá un milion d’èuros per la reconstruccion de la catedrala parisenca. Moudenc prepausarà a las assembladas de la comuna e de la metropòli lo pagament d’una subvencion d’un milion d’èuros, çò es 500 000 èuros per caduna.
 
Aquela mesura pòt descadenar la polemica. La comuna de Tolosa refusèt de pagar per far d’excavaments arqueologics a l’entorn de la basilica de Sant Sarnin, ont i auriá de vestigis antics. Qualques fonts arqueologicas asseguran qu’es aquela decision que costèt a la Ciutat Mondina sa candidatura al Patrimòni Mondial de l’UNÈSCO.



 


 





abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
32.

Te voli obsequiar amb un altra insult mallorquín amb amor: Beneit !

  • 1
  • 0
Topasa Deu Savés
31.

#25 E comentas pendent que la nòsta lenga es a crebar. Vergonha! au tribalh fenhant.

  • 1
  • 2
Adrian Tolosa
30.

D'aprèp The Time of Israel, lo primièr autodafé del Talmud foguèt en 1242 sus la plaça d'aquesta catedrala. 20 carretas porteron los livres. 1 200 volums del Talmud foguèts cramats.

  • 2
  • 0
Es Paums Vilamòs
29.

En quinsevolhe cas ei tostemps domatge que s'ahlame un monument..

  • 2
  • 0
La Miquèla Seta
28.

A l'escota das comentaris tan politics coma mediatics, lo « roman nacionau francés » es renforçat per çò que dison un « drama ». « L'Orguèlh de França » coma ditz la Canson, es a l'òbra.
Perqué los Occitans pòdon se jónher pas au concèrt de lamentacions.
790 ans e 3 jorns fai, a « Notre Dame de Paris », Raimon VII "dut se soumettre à l'humiliant rituel de la réconciliation canonique" (Michel Roquebert, L'Epopée cathare, tome 3, p.415). "Dépouillé de ses vêtements d'apparat, en chemise et en braies, pieds nus, il fut introduit dans la cathédrale" ; i recebèt l'absolucion de sos pecats (valent a dire aver reconquistat una part de son territòri que la Crosada li aviá raubat, valent a dire encara se conformar a las valors pròpias de sa quita societat) ; deguèt donar en maridatge a un fraire dau rei das Francs sa filha unenca. Aperabans, davant lo portau, èra estat constrench de jurar d'un biais solemne d'obesir sens condicions as òrdres de la Glèisa. Lo 13 o 14 d'abriu, aviá degut faire omenatge a Loís IX. Las condicions dau tractat de Meaux-Paris, establidas per la monarquia e la Glèisa, signan la fin de l'independéncia dau Comtat de Tolosa e de totes sos aligats. Car Raimon aurà pas d'autre enfant, e Joana sa filha morirà en 1271 sens eiretièr.a.
In memoriam.

  • 8
  • 0

Escriu un comentari sus aqueste article