Bandièra01 1180x150: País Invisible

Actualitats

crotz-tolosaCreated with Sketch.LengadòcLengadòc BasBesierés

Besièrs: s'es suicidada una ensenhaira del licèu Jean Moulin

Es lo segond suicidi dempuèi l'estiu passat dins aquel establiment, e lo seisen dempuèi 2008

| Lycée Jean Moulin
Se suicidèt dimars passat una conselhièra principala d'educacion del licèu Jean Moulin a Besièrs. Es lo segond suicidi dempuèi l'estiu passat dins aquel establiment, mas lo seisen dempèi 2008, çò qu'avertís net e clar de las condicions de trabalh e de la sofrença del personal d'aquel licèu, çò rapòrta France Bleu.
 
Après aquel novèl drama, lo rectorat de Montpelhièr a reagit e a mes e plaça una cellula psicologica, compausada de mètges, d'assistents socials, d'infirmièrs e de psicològs de l'educacion publica francesa dicha nacionala. Aquela cellula es al servici dels personals e dels escolans que la vòlgan sollicitar, mentre que s’espèra que los corses se tengan normalament. Los servicis academics an exprimit lor sosten a la familha e als pròches de la victima. De son costat, lo rectorat de Montpelhièr a dich que prendrà plan al seriós aqueles suicidis.
 
 
De marridas condicions de trabalh
 
Aqueste còp, la victima èra una femna de 62 ans. Son filh moriguèt fa dos ans e o mestrejava amb dificultat. Mas cal soslinhar que dins la davalada passada aviá denonciat de sofrença al trabalh, de malèsser e una manca de consideracion a France Bleu, dins una emission ont volguèt restar anonima.
 
D’efièch, los ensenhaires d'aquel centre denonciavan de marridas condicions l'an passat dins una manifestacion. Planhián la manca d'efectius e un nombre d'escolans per classa en aumentacion constanta.
 
 
L'establiment recebiá una atencion particulara del rectorat
 
L'establiment fasiá l'objècte d'una atencion particulara dempuèi 2011. Lo mètge de prevencion, los assistents socials del personal e lo psicològ del trabalh dels servicisi academics son estats sus plaça atentius al seguiment de las situacions individualas.
 
En mai d'aquò, en 2013, lo Comitat d'Igièna, de Seguretat e de las Condicions de Trabalh metèt en plaça de mesuras d'acompanhament. Tanben en 2014, après un autre suicidi d'un membre del personal, se tornèt metre en plaça, e en 2018 "lo dispositiu d'acompanhament desplegat a permés d'acompanhar las situacions individualas declaradas", segon lo rectorat.
 
En febrièr passat, un ensenhaire del collègi Victor Hugo de Seta subrevisquèt a sa temptativa de suicidi.
 
 
 
 
 


abonar los amics de Jornalet

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

L'ensenhament es un sector molt dur de trabalh, sabets qu' es una aula amb quaranta alumnes de dotze ans e haver-los d'explicar matematicas, fisica, lengas, geografia, etc. Los e las paures professors e professoras!

  • 1
  • 0
Pitaluga
2.

A! per metre en plaça de cellulas psicologicas son fòrts! Ont es lo "val mai prevenir que garir"?
E solide que van ensajar de botar totas las causas sus de problèmas personals ni per la letra d'aquela paura femna. Esperam que l'acadèmia diga coma lo cap de còla de France Telecom, quand diguèt: "A, òc, i a una mòda de suïcidis a France Telecom", amb 24 mòrts dins l'annada al comptador. Ba! Quina importància! Son pas que de RESSORGAS humanas. Se degalha ben de petòli, d'aiga, de minerals. Alara, las femnas o los òmes, rai!

  • 3
  • 0
Papioli
1.

En 2 jorns i aguet 2 suicides nòu dins la Poliça; quò pòrta lo nombre a 29 suicides dins la Poliça dempuei la debuta de l'annada.
Tot vai plan dins la societat!

  • 6
  • 0

Escriu un comentari sus aqueste article