Bandièra01 1180x150: Comuna de Tolosa

Actualitats

Segon Florence Parly, i a pas cap “de pròva” que d’armas francesas fagan de victimas civilas en Iemèn

Es atal que la ministra francesa de las armadas a reagit a las informacions del collectiu d’investigacion Disclose, qu’a desvelat las armas exportadas per França dins la guèrra en cors

| Kévin Veau
Segon la ministra francesa de las armadas, Florence Parly, i a pas cap “de pròva” que d’armas francesas fagan de victimas civilas en Iemèn. Es atal que reagiguèt dijòus passat a las informacions del collectiu d’investigacion Disclose, qu’aviá desvelat diluns un rapòrt classat secret de defensa.
 
Lo rapòrt en question, datat d’octòbre de 2018, ven de la Direccion de l’Informacion Militara e afirma que las armas exportadas de França, especialament de canons Caesar, serián utilizadas dins la guèrra en cors, compresas las zònas civilas.
 
Après que foguèt rendut public lo rapòrt, Parly diguèt sus Radio classique dijòus passat:
 
“A ma coneissença, aquelas armas son pas utilizadas de biais ofensiu dins aquela guèrra en Iemèn, e se pòt pas dire, doncas, de faiçon mecanica, –e cossí que siá ieu ai pas d’elements de pròva que permetan de dire aquò–, que d’armas francesas son a l’origina de victimas civilas en Iemèn”.
 
De mençonar que França foguèt en 2017 lo tresen exportator d’armas al Mond e que l’Arabia Saudita n’es un crompaire màger. Mai concretament es lo segond client pus important darrièr Índia e davant Qatar, çò rapòrta BFM TV. Dempuèi 2008, l’Arabia Saudita a comandat 11 miliards d’èuros d’armas a França.
 
 
Una guèrra que comencèt en març de 2015
 
Las armadas d’un desenat de païses, dirigits per l’Arabia Saudita, atacan dempuèi març de 2015 la milícia shiita dels huthis en Iemèn. Aquesta milícia, tanben coneguda coma Ansar Allah (los Partisans de Dieu) a lo supòrt d’Iran. Participan als bombardaments cinc païses del Conselh de Cooperacion del Golf ansin coma Egipte, Marròc, Jordania, Sodan e Paquistan. De lor costat, los Estats Units autorizèron un sosten logistic a las atacas sauditas contra los huthis.
 
Segon l’ÒNU, lo país es pròche de la catastròfa umanitària, e 21 milions de iemenitas an de besonh d’assisténcia en Iemèn del temps que las fòrças del govèrn, los saudians e los huthis, contunhan los afrontaments.
 
Las atacas contra los civils son frequentas, fins al ponch d’aver tuat d’enfants qu’anavan a l’escòla.
 
 
Alemanha cancelèt la venda d’armas a l’Arabia Saudita
 
En octòbre passat, la cancelièra alemanda, Angela Merkel, anoncièt que son executiu aviá anullat la venda d’armas a l’Arabia Saudita tant que s’esclaririá pas las circonstàncias de l’assassinat del jornalista Jamal Khashuqji (sovent transcrich Khashoggi). Parallèlament, los govèrns alemand, britanic e francés publiquèron un comunicat conjonch ont consideravan “injustificable” l’assassinat de Khashuqji que condemnan “dins los tèrmes pus energics possibles”. Lo ministre de l’economia alemanda, Peter Altmaire, a demandat als autres païses de suspendre tanben la venda d’armas a l’Arabia Saudita. De badas.


 
França e Espanha ne contunhan de vendre
 
Mas pel president francés, Emmanuel Macron, la venda d’armas auriá pas res a veire amb la mòrt del jornalista: “Aquò a pas res a veire amb lo subjècte que sèm a tractar. Es pas perque un dirigent ditz quicòm que soi obligat de reagir a cada còp”, çò diguèt Macron. De fach, Macron sembla de revendicar la presompcion d’innocéncia de Riad per l’afar Khashuqji. “Espèri que la vertat serà establida”, çò diguèt, malgrat las pròvas.
 
Tanben lo president del govèrn espanhòl, Pedro Sanchez, anoncièt al Congrès dels Deputats que cancelariá pas la venda d’armas a l’Arabia Saudita “a causa dels interèsses d’Espanha e de l’emplec dins de sectors estrategics dont plusors son situats dins de zònas tocadas pel drama del caumatge”. Sánchez fasiá referéncia a l’entrepresa publica Navantia qu’es a fabricar cinc vaissèls de guèrra per l’Arabia Saudita, e qu’emplega 6000 personas.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Las armas francesas matan a la gent al Iemen, mas son pas franceses eh ?

  • 1
  • 0
Mèfi! 31
4.

Las armas francesas son pas d'armas de per natura, e se'n pòt pas respondre de la destinacion.

  • 3
  • 1
Florence Parly
3.

Las armas francesas nafran pas degun ! Basta de veire çò que fan las armas de las fòrças de manten de l'òrdre subres las manifestacions dels dissabtes ! Cap ombra pus mendre de començament del cap del det d'una victima…

  • 13
  • 0
Lo Macronàs, Gardian e Aparaire del Roman Nacional Palàs de l\'Elisèu, Demora dels Dieus
2.

Es plan conegut, França pot pas èsser missanta. Quand vend d'armas son d'armas que fan pas mal, vist que l'essència mèsma de França es lo bon, lo bèl e lo ben. CQFD.

  • 5
  • 0
Pitaluga
1.

I a pas cap de pròva que la Parly siague ministra.
I a pas cap de pròva que Macron es estat fabricat per Attali, Niel, Pigassa e Cia.
I a pas cap de pròva que Castaner s'escapèt de Maiòta abans ora per èsser sus la fòto de l'incendi de NDDP.
I a pas de pròva que uèi es dissabte.
Eca.

  • 11
  • 0

Escriu un comentari sus aqueste article