Bandièra01 1180x150: Comuna de Tolosa

Actualitats

Àustria organizarà d’eleccions anticipadas a causa d’un escàndol de corrupcion

Un vidèo mòstra lo vicecancelièr ultradrechista, Hainz-Christian Strache, a acceptar de subornacions

Hainz-Christian Strache demissionèt dissabte del govèrn austrian e de son partit en seguida de la publicacion d’un vidèo que lo mostrava en acceptant de subornacions
Hainz-Christian Strache demissionèt dissabte del govèrn austrian e de son partit en seguida de la publicacion d’un vidèo que lo mostrava en acceptant de subornacions | Leonhard Foeger / Reuters
Àustria organizarà d’eleccions anticipadas a causa d’un escàndol de corrupcion que tòca lo vicecancelièr, Hainz-Christian Strache, cap del partit d'extrèma drecha FPÖ que sosteniá lo govèrn del Partit Popular del cancelièr Sebastian Kurz.
 
Strache demissionèt dissabte del govèrn austrian e de son partit en seguida de la publicacion d’un vidèo que lo mostrava a acceptar de subornacions. Lo filme, publicat per los jornals alemands Der Spiegel e Süddeutsche Zeitung, mòstra Strache a prometre de mercats publics en contrapartida de recebre d’argent negre per finançar sa campanha electorala. Se tracta d'un enregistrament fach amb una camèra amagada fa dos ans a Eivissa, pauc de temps abans las eleccions en Àustria. Après l’escàndol de la demission de Strache, Kurz expliquèt que lo voliá pas pus a son costat.
 
Es de veire la portada d’aquela crisi de govèrn en Àustria fàcia a las eleccions europèas de dimenge que ven, e se tocarà l’aliança paneuropèa dels partits de drecha populista e de l’extrèma drecha.
 

 
Una eleccion tota plena de trabucs
 
Los austrians foguèron cridats en decembre de 2016 per lo segond còp a las urnas per elegir al segond torn lor nòu president. S’agissiá del recomençament del segond torn que s’èra debanat lo mes de mai precedent, que lo ganhèt l’ecologista Alexandre Van der Bellen amb un resultat fòrça sarrat: un 50,3% dels vòtes, davant lo 49,6% que l’atenguèt l’FPÖ.
 
Ça que la, lo Tribunal Constitucional aviá anonciat cinc meses abans, en seguida d’una reclamacion de l’FPÖ, que caldriá tornar començar lo procès per d’irregularitats dins lo comptatge dels vòtes.
 
L’eleccion se deviá tornar far lo 2 d’octòbre de 2016, mas se reportèt fins al 4 de decembre per un defaut de l’adesiu de las envolopas dels vòtes per corrièr.
 
Fins ara Àustria aviá un president ecologista, Van der Bellen, un cancelièr de drecha, Sebastian Kurz, qu’aviá lo sosten de l'extrèma drecha amb Hainz-Christian Strache.
 

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

A Austria l'an omplida d'emigrants la dreta capitalista de l'UE, per fotre los trabalhadors austriacs, e ara ja s'han cansat de que los obligassen a acolhir tants d'emigrants. Cresi que n'ha rebut mig milion.

  • 1
  • 0

Escriu un comentari sus aqueste article