Lo Ministèri de la Cultura d’Itàlia a barrat lo projècte d’universitat d’extrèma drecha d’Steve Bannon. Installat dins la chartrosa de Trisulti, un monastèri del sègle XIII a un pauc mai de cent quilomètres de Roma, las autoritats an refusat la licéncia d’usatge del sit per de presumidas “violacions” del contracte.
 
Sonada “Institut Catolic Dignitatis Humanae”, es una escòla que sa tòca es de crear de politics ultraconservators e que s’inspira suls “fondaments de la cultura judeocrestiana”. L’aviá mesa en òbra l’èx-cap d’estrategia de l’Ostal Blanc, qu’ara ajuda las campanhas electoralas de divèrses movements politics d’extrèma drecha e xenofòbs.
 
Lo ministre de la cultura italian, Alberto Bonisoli, a anonciat que retira lo permés d’usatge del sit après doas inspeccions de foncionaris.
 
Lo ministèri aviá autorizat l’Institut Dignitatis Humanae a emplegar per 19 ans la chartrosa en pagant 100 000 èuros per an. Mas quand Bannon e son sòci, Benjamin Harnwell, comencèron de far de publicitat ultraconservatritz e populista, lo ministre Bonisoli, del Movement 5 Estelas, entamenèt una enquèsta. A mai, los abitants de Collepardo, ont se tròba lo sit, an fach divèrsas protèstas contra lo projècte ultradrechista de Bannon e l’ocupacion del monastèri. En mai d’aquò, los abitants de la region podián pas pus vesitar liurament lo monument.
 
Las entravas del Ministèri italian de la Cultura poirián mentre lo ponch final al projècte de laboratòri ultradrechista de Bannon en Euròpa. Aital se conclutz lo sòmi de Bannon d’aviar una union dels partits d’extrèma drecha europèus dels puèges de Collepardo estant, al sud de Roma. Dins aquela chartrosa, voliá crear una generacion de nòus politicians “crestians” capables de “promòure los fondaments judeocrestians de la civilizacion occidentala” suls modèls de las politicas de Matteo Salvini e Viktor Orbán.
 
 

Dopo due ispezioni del .@_MiBAC e il parere dell'avvocatura di Stato, che hanno evidenziato criticità sul bando di concessione della certosa di #Trisulti alla Dignitatis Humanae Institute, oggi ho deciso di avviare la procedura di revocahttps://t.co/sB4wEp55gYpic.twitter.com/WGTHM53Rzh

— Alberto Bonisoli (@BonisoliAlberto) May 31, 2019