Bandièra01 1180x150: Comuna de Tolosa

Actualitats

Risca fins a 20 ans de preson pel salvament d’un milièr de migrants

La capitanessa del naviri umanitari Sea Watch e son equipatge son jutjats en Itàlia

| Lisa Hoffmann
Pia Klemp es una biològa alemanda de 36 ans qu’es estada capitanessa de naus de salvament de migrants en Mediterranèa, dont lo Sea Watch. Ara es jutjada en Itàlia per aquelas operacions de salvament e risca fins a 20 ans de preson e de multas plan nautas. Las autoritats italianas acusan Pia Klemp de fomentar l’immigracion illegala. Se lo jutjament se conclutz amb una condemnacion, ela farà una apelacion davant la Cort Europèa dels Dreches Umans d’Estrasborg.

Segon TV 5 Monde, "son almens quatre autoritats d’enquista italianas diferentas que trabalhèron contra ela e son esquipatge, dont los servicis secrets italians. Lo pus inquietant rèsta que son naviri foguèt mes sus escota, tot coma los telefòns e los ordenadors portables de l’esquipatge, tot aquò doblat d’una susvelhança operada per d’informators presents sus d’autres naviris".
 
La cadena publica alemanda WDR apond qu’amb los naviris Sea Watch e lo Sea Watch 3, Klemp a ajudat personalament al salvament de mai de 1000 personas en perilh de morir negadas sus de barcas malseguras mentre qu’ensajavan d’arribar en Euròpa en cèrca d’una vida melhora.
 
S’es lançada una peticion sus Change.org per demandar qu’Itàlia abandone la procedura penala contra la capitanessa alemanda e son esquipatge.
 
 
Acusan l’Union Europèa de crimes contra l’umanitat
 
D’autre caire, dos avocats acusan l’Union Europèa e sos estats membres de crimes contra l’umanitat per murtre, tortura, tractaments inumans e desplaçaments forçats comeses a l’encontre dels migrants qu’ensajan de fugir Libia, çò rapòrta Le Monde. Dins un denóncia facha lo 3 de junh passat al procuraire de la Cort Penala Internacionala, denóncian de politicas que cèrcan "d’enraiar a tot prètz los fluxes migratòris vèrs Euròpa, comprés pel murtre de milièrs de civils innocents que fugisson una zòna de conflicte armat".  Entre d’autras causas, acusan l’UE d’aver fornit als gardacòstas libians "d’informacions talas coma la localizacion dels batèus de migrants en destressa".
 
L’Union Europèa declarèt qu’una de sas tòcas per 2019 èra de metre lo ponch final al "modèl economic dels trafegaires d’èssers umans al sud de la Mediterranèa centrala". Per o far, entraïna la marina e los gardacòstas de Libia e contribuís a que siá efectiu l’embarg d’armas a Libia, que l’a declarat l’ÒNU. Pasmens, garentís pas d’alternativas d’aculhença, e los migrants e los refugiats son totjorn de victimas de las màfias en riscant lors vidas per ensajar de trobar un avenir en Euròpa.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Ara que ten lo poder l'extrema dreta ,avem d'anar tots units contra lo fachisme

  • 7
  • 3
Shalomon Jerushaleïm
4.

D’autre caire, un batalhon d'avocats deurián tanben acusar l’Union Europèa e sos estats membres, notadament França e Espanha, de crimes contra l’umanitat per exterminacion culturala e linguïsitca (França), tortura, tractaments inumans (polícia espanhòla e francesa) e embarraments forçats comeses a l’encontre dels manifestants e dels votants qu’ensajan de s'opausar a la montada dels faiscismes. Los que son capables de fotre a la mar tot un fum de paurilha fugissent misèria e mòrt promesa, guèrras e orrors pòstcolonialas, cossí serián capables de respectar lors pòbles ? MEteissa racalha, meteissas orrors.

  • 11
  • 8
Pitaluga
3.

Val mai sauvar lo mond de las finanças que viatjan en avion e se chautan de l'emprenta carbòni que la paurilha que risca sa vida dins un bombard per traversar la mar per fin de fugir la corrupcion e la pollucion provocada a cò lor pels primièrs. Es pas solament qu'es mai comòde, es qu'en mai d'aquò te recompensaràn en t'ajudant a dintrar e demorar dins los Elisèus del mond.

  • 14
  • 6
oksitanlaştıramadıklarımızdanmısınız Apraquital, tresena tenda apèi lo tuc còsta lo riu ont se banhan nudas las zègas a negrenuèch
2.

E ont es oé oé primièr ? E lo quilhòl amorós ? An pas alargat la feramia auèi ?

  • 0
  • 0
INRI
1.

Aquem ipocrit de Salvini es fòrça estranh, sembla pas aver comprès l'escrancament del pont Morandi.

  • 13
  • 3

Escriu un comentari sus aqueste article