Bandièra01 1180x150: Comuna de Tolosa

Actualitats

Mali: masèl contra lo pòble dogon

Dins la nuèch de dimars a dimècres, un grop d’òmes armats entornegèron lo vilatge de Sobabou e incendièron los ostals, amb lo mond dedins. Los qu’ensajavan de fugir èran fusilhats

| @metesohtaoglu
Almens 95 mòrts, un vintenat de despareguts, de tropèls entièrs abatuts e d’ostals incendiats es lo tragic bilanç del masèl que ven de lo patir lo pòble dogon dins lo vilatge de Sobabou, dins la region de Sangha, al centre de Mali, ço rapòrta France24. Dins la nuèch de dimars a dimècres, un grop d’òmes armats entornegèron lo vilatge e incendièron los ostals, amb lo mond dedins. Los qu’ensajavan de fugir èran fusilhats.
 
Lo govèrn de Mali a dich que l’ataca es òbra de terroristas. Ara, un grand desplegament de policièrs ensaja d’arrestar los autors. Lo president del país, Ibrahim Boubacar Keita, a dich que “prendrà totas las mesuras de besonh per arrestar e punir los autors del chaple”.
 
Segon las primièras ipotèsis, s’agiriá d’un revenge de l’ataca que la patiguèt lo pòble peul en març passat, ont se tuèt 157 personas. Los afrontaments entre aqueles pòbles es abitual dempuèi 2015, en seguida de l’implantacion en Mali d’un grop jihadista.
 
 
Declaracion de guèrra
 
De son caire, la mílicia dogon a publicat un comunicat que condemna “aquel acte terrorista e genocida intolerable” e fa una crida al pòble dogon a se mobolizar per “defendre lor territòri”. O an considerat una “declaracion de guèrra” e asseguran qu’es lo pòble dogon qu’assegurarà sa seguretat car “ni l’estat ni la comunautat internacionala s’interèssan pas a la situacion grèva que patisson”.
 
D’autre caire, cal tanben dire, que divèrsas organizacion dels Dreches Umans avián acusat los dogons de cometre d’abuses contra de civils peuls. Los dogon butan aquelas acusacions.
 
En setembre passat, los dogons e l’estat malian signèron un acòrdi d’alta al fuòc amb lo govèrn malian. Convenguèron d’un procès de desarmament qu’es pas conclús.
 
Quant als peuls, a eles lor agrada pas brica la creissenta preséncia de grops jihadistas dins la region, tant d’Al Qaida coma de l’Estat Islamic. Aquestas organizacions terroristas internacionalas aurián engatjat de joves peuls dins lors grops armats en profechant de l’inestabilitat de Mali, en provocant d’afrontaments sagnoses entre los pòbles peul e dogon.
 
Los dogons son un pòble d’aperaquí 700 000 personas qu’abitan la region sonada País Dogon dins l’estat malian. Son abans tot de cultivators e son reputats per lor cosmogonia e lors esculturas.
 
Quand als peuls, son un pòble tradicionalament pastoral establit dins tota l’Africa de l’Oèst e al delà de la benda sahelosahariana.


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
2.

#1 Mon paure BBJ, i a plan de mond que comprenon pas l'ironia. Lo politicament corrècte fa de degalhs a cò dels comentaires.

  • 2
  • 0
Black Blòc Joe
1.

Dins la nuèch de dimars a dimècres, un grop d’òmes armats entornegèron lo vilatge de Sobabou e incendièron los ostals, amb lo mond dedins. Los qu’ensajavan de fugir èran fusilhats : se cresián a Besièts en 1209 ? O a Marmanda, benlèu, 20 ans mai tard… ?

  • 3
  • 6

Escriu un comentari sus aqueste article