Bandièra01 1180x150: Comuna de Tolosa

Actualitats

Guardatz-ve de la negada!

Dab l’arribada de l’estiu, avisatz-ve dab las negadas. L’agéncia sanitària Santat Publica França que vien de publicar las maishantas chifras de 2018

L’agéncia sanitària Santat Public França que vien de publicar las maishantas chifras de 2018. En efèit, l’an passat entre lo prumèr de junh e lo 30 de seteme, que comptèn 1649 negadas, per mei de 400 morts. L’enquèsta que muisha ua hauça inquietanta de las negadas accidentaus d’un 30% en rapòrt a 2015. Qu’i caben quauques chifras qui dan l’esvarge: mei d’un francés sus sheis non sap pas nadar. Que ns’avisan tanben d’un percentatge qui pòt suspréner: pendent l’estiu de 2018, los menhs de sheis ans que representavan un 9% deus morts per negada e los de mei de 65 ans, un 35%.
Si la màger part qu’an lòc dens las piscinas privadas, los arrius, los lacs e la mar que son concernits autanplan. D’autas estatisticas o chifras que son tanben claras:
 
— la negada qu’ei la prumèra encausa de mortalitat accidentau deus mensh de 25 ans en França;
 
— entre l’estiu de 2015 e lo de 2018, las negadas accidentaus qu’an aumentat d’un 77% en çò deus menhs de 13 ans;
 
— suu medish periòde, que nòtan enfin ua hauça d’un 96% de negadas accidentaus deus mensh de 6 ans.
 
Entà har cap ad aqueras chifras, lo Ministèri deus Espòrts, la Federacion Francesa de Natacion e la deus pompièrs qu’avian ua navèra campanha de prevencion en la quau e bremban quauques reflèxes de non pas desbrombar:
 
— avisatz-ve deu vòste nivèu de practica e tanben lo deus vòstes mainats;
 
— causitz zònas de banhada susvelhadas;
 
— informatz-ve sus las condicions de banhada e arrespectatz las consignas de seguretat;
 
— demoratz a l’argueit quan se banhan los tanhents;
 
— compratz brassaus e flotaders dab la marca CE.
 
Entà comunicar, qu’an tanben creat la campanha #VigilanceNoyade, qui s’empara sus clips vidèos difusats suus hialatas sociaus, dab mei que mei lo nadaire Alain Bernard.
 
 
Lo govèrn francés tanben
 
Lo govèrn qu’avè aviat augan un gran plan d’accion, dab cors de natacion o iniciation a gratis de la mairau enlà tà que los joens e sapin nadar en arribant au collègi. Ua bona iniciativa, solide, mes qui benlèu ne considèra pas lo problèm sancèr, qui pertòca shens los nadaires: en efèit, segon lo sindicat nacionau deus mèstes nadaires, que hè hrèita tanben aumensh 5000 mèstes nadaires en França. En quauques parçans augan, las piscinas municipaus n’an pas obèrt pr’amor de l’abséncia de professionaus entà susvelhar.
 
 
Las classas blavas
 
En mei de las accions preventivas tà las familhas, lo Ministèri deus Espòrts qu’a tanben anonciat mei d’ua mesura entà travar la hauça de las negadas, au demiei de las quaus las classas blavas.
Que seràn semblablas a las classas verdas au nivèu pedagogic e de l’organizacion, mes viradas de cap tà la natacion.
 
 
La negada “seca”
 
Enfin, quan non seré benlèu pas ua negada vertadèra segon los estudis, avisem-nse tanben de la negada seca, ua patologia que pòt aparir après aver bevut lo bolhon. Que sons lesions muscularas qui pòden miar a la mort. Los simptòmas que son los seguents: entre ua òra e 24 òras après l’incident, la victima qu’encontra trebucs respiratòris, dab a còps frèbe e dolors. La presa en carga medicau que vad indispensabla. Lo nombre de cas qu’ei totun hèra flac. Nat besonh d’esvarjà’s au mendre bolhon, mes que conselhan totun de susvelhar simptòmas eventuaus.
 
Lo numèro d’aperet d’urgéncia europèu qu’ei lo 112 e lo numèro d’urgéncia en mar qu’ei lo 196.
 
 
 
 
Ràdio País
 
 
 
Aqueste article es possible gràcias a un acòrdi de cooperacion entre Jornalet e Ràdio País.





 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Baron de la Paliça
3.

#2 E atal se nega, çò li seriá pas arribat, foguèsse pas nascuda… Mas per bona sòrt, en lengadocian, d'aiga, non n'i aviá gota !

  • 2
  • 6
Adixatz Paris
2.

#1 Pas de bol, ''guardà's'' en langue gasconne n'a pas tout à fait le même sens que ''se garder de'' en français. Votre pauvre tentative d'ironie tombe à l'eau.

  • 2
  • 2
Baron de la Paliça
1.

Vivents, gardatz-vos de morir…

  • 5
  • 12

Escriu un comentari sus aqueste article