Bandièra01 1180x150: Comuna de Tolosa

Actualitats

Escàndol a la publicacion de las nòtas del bachelierat dins l'estat francés

Lo ministre de l'educacion fa afichar totas las nòtas del bachelierat e mai li manque lo resultat d'unes 30 000 examens

| @LaCroix
De milièrs de liceans de l'estat francés an recebut de nòtas provisòrias o erronèas de lor bachelierat. Lo ministre de l'educacion, Jean-Michel Blanquer, a d’efièch fach afichar totas las nòtas aqueste divendres, malgrat qu’aguèsse pas los resultats d'environ 30 000 examens, qu'avián retenguts almens set cents ensenhaires en cauma. En plaça del resultat de las espròvas, Blanquer a fach publicar las nòtas de l'annada escolara dels estudiants que ne teniá pas los resultats.
 
Los professors de licèu protèstan contra la reforma del licèu, del bachelierat e tanben contra la lei nomenada de "l'Escòla de la Fisança", ja en vigor. Après las caumas de la susvelhança dels examens, una partida dels ensenhaires an retengut o rendut amb retard las nòtas dels examens.
 
La consequéncia logica de tot aquò es que los resultats dels escolans afectats son falses. Lo ministre a dich que quand apareisseràn las nòtas mancantas valdrián sonque se son superioras a las nòtas de l’annada escolara.  Aquò seriá contradictòri amb la lei qu'impausa la sobeiranetat de las juradas. Lo ministèri e los nauts foncionaris pòdon pas influenciar las jurada e, doncas, aquelas decisions poirián èsser illegalas.
 
En mai d'aquò, a partir de diluns, los candidats qu'an obtengut entre 8 e 10 ponches de mejana generala seràn obligats de passar una espròva suplementària per daverar lo bachelierat, e es possible que qualques unes la degan passar injustament.
 
La majoritat dels estudiants afectats son de circonscripcions escolaras del nòrd de França (Créteil e Versalhas) e tanben del sud (Dijon). En Occitània, la zòna pus afectada es l'acadèmia de Tolosa.
 
 
Una reforma neoliberala
 
Los caumaires vòlon forçar lo govèrn francés de tornar dobrir las negociacions sus la reforma de l'educacion, que son article primièr sembla d’obligar los ensenhaires al dever de resèrva, çò qu’implicariá que poguèsson pas pus exprimir lor vejaire public sus l’institucion, participar a una manifestacion o signar una peticion. E mai los sindicats denóncian qu'aquela lei ten una logica neoliberala que cèrca la reduccion d'emplecs e d’opcions, la barradura d'escòlas, e empenh los escolans devèrs las escòlas privadas. En mai d'aquò, risca de desaparéisser lo pauràs ensenhament de l'occitan e d'autras lengas territorialas autras que lo francés.
 
 


 
 
 
 
 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Robespèire
1.

Escrivètz "aquelas decisions poirián èsser illegalas.". Vos i sètz un pauc mancats ; caldriá escriure "aquelas decisions non pòdon èsser pas illegalas". Çò qu'o pròba es çò que escrivètz just abans, non ?

Escrivètz tanben : "En mai d'aquò, risca de desaparéisser lo pauràs ensenhament de l'occitan e d'autras lengas territorialas autras que lo francés.". Aquò significa clarament que s'agís d'una lei discriminatòria e xenofòba, donc anticonstitucionala e contrària als tèxtes fondators europèus, tant coma als tèxtes de la declaracion universala dels dreits umans…

Davant constats aital, vesi ieu lo "dever d'insurreccion".

  • 7
  • 2

Escriu un comentari sus aqueste article