L’Espital de la Val d’Aran aurà un nòu mamograf gràcias al don que l’a fach l’entrepreneire espanhòl Amancio Ortega a la santat publica de l’estat. S’agís d’un aparelh de darrièra generacion que permet quitament far de pròvas de biopsia, sa fisablitat de diagnostic es totala e melhorarà lo temps de realizacion de las mamografias. L’esplech serà installat dins la primièra setmana d’agost e lo personal de l’espital aranés deu seguir una formacion per lo far foncionar.
 
Lo nòu aparelh remplaçarà lo mamograf que lo donèt en 2002 l’ONG Soroptimist International a l’espital de Vielha.
 
Amancio Ortega es lo 6n òme pus ric de la planeta segonForbes. S’agís d’un entrepreneire espanhòl fondador de la multinacionala textila Inditex que comercializa las marcas Zara, Massimo Dutti, Pull & Bear, Bershka,Oysho, Kiddy’s Class, Uterqüe, Stradivarius, e d'autras. Es estat denonciat en de païses coma coma Marròc, Portugal, Argentina o Brasil, après la descobèrta d’obradors clandestins ont demoravan d’enfants menors esplechats en condicions inumanas amb de jornadas de trabalh de mai de dotze oras.
 
D’autre caire, creèt en 2001 una fondacion privada amb la quala promòu d’activitats restacadas amb l’educacion e l’assisténcia sociala e a fach de dons subregeneroses per combatre lo càncer.

 

Aué arribe ar Espitau dera Val d’Aran un nau mamograf que substituirà er actuau, que siguec ua donacion deth Club Soroptimist dera Val d’Aran, artenhut gràcies as sues accions solidàries https://t.co/KXFOsH6dJSpic.twitter.com/NxX7v80eZM

— Conselh Generau Aran (@conselharan) July 22, 2019