Bandièra01 1180x150: País Invisible

Actualitats

La Passem arriba en Roergue

La corsa per la lenga occitana que comencèt  amb succès en Bearn en 2018, percorrerà en 2020 tanben las Lanas, Bigòrra... e Roergue

La corsa per la lenga occitana La Passem arriba ara en Roergue. Un collectiu es a se formar per organizar al mes de junh de 2020 aquela granda corsa de 400 quilomètres en relèus, sens s’arrestar, de jorn coma de nuèch, de Viaur a Carladés, de las montanhas d’Aubrac als causses, de Leveson als rogièrs de Camarés, de la ribièira de Marcilhac als segalars. Quatre cents quilomètres per dire l’urgéncia e la necessitat de la transmission de la lenga, per finançar de projèctes novèls e estructurants, per comunicar, per partejar, per far la fèsta.
 
L’organizacion d’aquel collectiu e lo lançament de l’eveniment se presenta deman près de Rodés amb un aperitiu e un repais tirat de la saca. Rendètz-vos a 19h al pargue de Vabres, a 7 km de la capitala de Roergue sus l’estrada de Marcilhac. Los organizaires menan l'aperitiu, las taulas, las cadièras, los veires, las escudèlas, los cotèls e las forquetas, del temps que los convidats tiran lo repais de la saca.
 
La primièra edicion de La Passem se passèt amb grand succès en Bearn en 2018 e arribèt d’amassar 48 000 èuros que financèron uèch projèctes per la lenga occitana. L’edicion de 2020 percorrerà Bearn, las Lanas e Bigòrra del 30 d’abril al 3 de mai. En junh, l’eveniment contunharà en Roergue, e esperam que, lèu, la corsa tocarà tota Occitània de Medoc a las Valadas.
 
Un dels aspèctes pus importants d’aquela corsa es la mobilizacion generala que se ten dins totas las vilas e vilatges que travèrsa, plenas d’animacions en favor de la transmission de la lenga nòstra.
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
12.

#11 Ieu tanben!

  • 1
  • 0
gj 31
11.

completament d’accòrd! #9

  • 2
  • 0
gj 31
10.

I aura au mitan de setème ua amassada ta lançar la dinamica sus tolosa! ENDAVANT!

  • 7
  • 0
Hilh
9.

#8 Justament qu'ei faus! Aquera premsa n'i hè pas arren. Çò qui cau qu'ei que l'eveniment e sii coneishut peu parçan. Qu'ei ad aquera escala que lo monde ei pertocat e pòt har bèra la corruda.

  • 4
  • 0
Roergue si
8.

#7 Parli pas de la premsa regionala gascona o de Jornalet, mas dels Monde-Libé-Télérama-LePoint-LObs-BFMTV-La 1, La 2, LCI, LCP, e patin-cofin. S'aqueles se'n fan pas lo resson es coma s'aquo avia pas jamai existit. Dura lei qu'aquela de la mediaticalha ! Mai que mai en Parislandia.

  • 4
  • 1

Escriu un comentari sus aqueste article