En 1882, lo poèta catalan Jacint Verdaguer pugèc sus la cima de l’Aneto en tot traversar la Val d’Aran. D’aquel eveniment se’n presentèt un filme documentari en catalan entitolat Maleïda 1882que ne parlava Zep Armentano fa qualques jorns dins sa tribuna d’opinion. “Maleïda” (Maudicha) es lo nom tradicional catalan d’Aneto, justament situat dins lo massís de Maladeta (o “les Maleïdes”).
 
Ara, lo Musèu de la Val d’Aran consagra la setmana venenta, del 5 al 8 d’agost, a la commemoracion d’aquel eveniment. I es present l’escrivan e protagonista del filme mençonat, Bernat Gasull, qu’es un gran amator de la montanha.
 
La setmana comença diluns amb una conferència de l’escrivan e actor sus l’aventura de Verdaguer en Aran. Dimars, lo programa contunha amb una caminada sus las piadas de Verdaguer a Montgarri que se completa dimècres de Salardú fins al riu Malo e dijòus a Es Bòrdes d’ont lo poèta emprenguèt lo camin d’Aneto. Divendres conclutz la setmana amb la projeccion del filme dins la glèisa de Sant Joan d’Arties amb la preséncia de Gasull e quitament de son realizaire Albert Naudín.
 

SETMANA MALEÏDA (5-9/08), ua oportunitat tà conéisher era aventura de Verdaguer, qu’en 1882 arribèc enquiara Maleïda (tuc der Aneto), en tot passar per Aran.
Seguís es paraules e passi der illustre poèta e excursionista damb er escrivan Bernat Gasull. #anderamemoria2019pic.twitter.com/TKuJe6re2C

— Musèus Val d'Aran (@Museus_ValAran) July 31, 2019