Bandièra01 1180x150: Comuna de Tolosa

Actualitats

L’umanitat a agotat totas las ressorsas qu’aviá per ongan

Dijòus passat, 29 de julhet, la Tèrra intrèt en deficit ecologic

L’umanitat a ja consumat totas las ressorsas naturalas que la Tèrra pòt produire en un an. Dijòus passat, 29 de julhet, la planeta intrèt en deficit ecologic, çò anoncièt Global Footprint Network (GFN) —qu’estúdia las ressorsas mondialas que se consuman e cossí se gerisson— en tot avertir que, dempuèi dimècres passat, l’umanitat viu “a crèdit de la planeta e de las generacions futuras, en subresplechant las ressorsas naturalas e en amolonant de carbòni dins l’atmosfèra”.


L’òme consuma fòrça mai de ressorsas que las que pòt produire la planeta. Segon los calculs del GFN, per cobrir la demanda de ressorsas del consum uman, caldriá una planeta e mièja, e se contunham de manténer aquel nivèl, a la mitat del sègle caldrà ja doas planetas. Mathis Wackernagel, fondador del GFN, explica qu’aqueles darrièrs cinquanta ans lo deficit ecologic a crescut d’una manièra exponenciala, e basta pas d’una planeta per satisfar tot lo consum e per absorbir tot lo curum. L’umanitat consuma un 50% de mai de las ressorsas disponiblas que, en mai d’aquò, se son reduchas de la mitat dempuèi 1961.
 
“La degradacion de l’environament mena inevitablament a una reduccion de las tèrras productivas, aital nòstre deute aumenta e condemnam las generacions futuras”, çò avertís lo GFN. Segon las lors donadas, la causa principala del deficit son las emissions de CO₂, qu’equivalon a un 55% de l’impacte environamental; la rèsta ven de l’esplecha de las ressorsas naturalas.
 
Per contra, se capitam a retardar aquela data de cinc jorns cada annada, en 2050 poiriam viure tornarmai amb la capacitat de la planeta.

 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pierre Terral
5.

La còca s'es pas facha bèla mas i a totjorn mai de monde per la partejar. Avèm ben la Greta e tot lo tarabast mediatique per sonar "l'alarma climatica" mas cossí s'entend pas parlar mai qu'aquò de "l'alarma demografica" que d'unes sónan dempuèi quaranta ans ?

  • 2
  • 0
Gèli Grande Lairac en Agenés
4.

Conselhi als adorators de Santa Gretà de legir çò que seguis
https://reporterre.net/Le-capitalisme-vert-utilise-Greta-Thunberg?fbclid=IwAR1mAWAD7k8edm9RRz6qLuQATO_pYCo10sojM3YHjn1csE7arYwZao1rVeo

  • 2
  • 0
Guilhèm Thomas Tolosa
3.

#1 Segurement es en tren de legir l'editorial de "Lo Lugarn".

  • 9
  • 2
Guilhèm Thomas Tolosa
2.

Pas mai de lingombaus per ongan ! Acabat !

  • 3
  • 2
Gèli Grande Lairac en Agenés
1.

Hilh de quauque !
Mas que fa Santa Gretà ?
Coma d'acostumada braceja ....

  • 6
  • 12

Escriu un comentari sus aqueste article