Bandièra01 1180x150: Comuna de Tolosa

Actualitats

Crisi de Cashmir: Paquistan a pres de mesuras fermas envèrs Índia

A decidit de n’expulsar l’ambaissador e de cancelar lo comèrci dels dos païses

| @Lalika79
Paquistan a exprimit son refús “ferme” de la repression d’Índia sus Cashmir e a decidit de fòrabandir l’ambaissador indian, de traire l’ambaissador paquistanés de Nòva Delhi e de d’anullar lo comèrci entre los dos païses, que l’an passat arribèt als 2 miliards de dolars. E mai lo govèrn paquistanés a decidit de “reduire” las relacions diplomaticas amb Índia. “Lo primièr ministre a demandat que s’activen totes los canals diplomatics per expausar la realitat del brutal regim faissista indian”, çò anóncia l’executiu paquistanés dins un comunicat.
 
En mai d’aquò, lo govèrn de Paquistan vòl denonciar a l’ÒNU la decision d’Índia d’eliminar l’article 370 de la Constitucion qu’autreja a l’estat de Jammu e Cashmir de capacitats legislativas. Per Islamabad, se tracta d'una accion illegala perque Caishmir es reconegut internacionalament coma un "territòri disputat" e subjècte a las resolucions qu’a emesas long dels ans lo Conselh de Seguretat de las Nacions Unidas. Es a dire que Paquistan considèra que la decision del nòu govèrn nacionalista indian es sonque “una annexion de Cashmir”.
 
L’armada paquistanesa es ara especialament vigilanta après lo desplegament de l’armada indiana en Cashmir.
 
 
Índia a desmantelat l’estat de Cashmir e l’a ocupat militarament
 
Lo govèrn d’Índia a suprimit l’estatut especial de la region de Cashmir, n’a anullat l’autonomia, a levat lo servici de telefòn e d’Internet, a arrestat los èxpresidents e los principals caps de l’oposicion son assignats a domicili. A mai, l’armada contraròtla la zòna en estat d’emergéncia e las reünions de mai de 4 personas son enebidas.
 
S’agís d’una mesura que lo nacionalisme indian reclamava dempuèi longtemps, mas que poiriá descadenar una crisi politica e sociala. De fach, la fòrta preséncia de l’armada fa pensar a una imminenta revòlta interiora.
 
 
Un territòri disputat
 
L’ancian principat de Cashmir foguèt devesit entre Paquistan e Índia après la particion de las Índias de 1947, un còp acabada oficialament la colonizacion britanica. Lo maharajà que governava lo país decidiguèt que lo territòri de majoritat musulmana anèsse dependre de Nòva Delhi a la condicion que s’i mantenguésse un cèrt autogovèrn amb de competéncias especialas.
 
Après la particion, la zòna occidentala e septentrionala demorèron jos l’administracion de Paquistan del temps que la region centrala, meridionala e orientala demorava jos l’administracion d’Índia. Es aquela part, que constituissiá fins ara l’estat de Jammu e Caishmir, qu’ara Índia ven de desmantelar. E mai i a doas regions de Cashmir, basicament despobladas e administradas per China.
 
Dempuèi 1947, Paquistan revendica que tot Jammu e Caishmir faga partida de son territòri pr’amor qu’es una region de majoritat musulmana. Aquò es verai per la Val de Cashmir mas pas per la region de Jammu qu’es de majoritat indó. De son caire, lo nacionalisme indian reclama a Paquistan las zònas de l’ancian principat que las administra ara l’estat vesin.
 
Alternativament, un movement pròpri revendica un referendum d’independéncia dempuèi los ans 1980. Aquel movement independentista a lo sosten majoritari de la populacion dins la Val de Cashmir

 
 



Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Fa por, i no s'entén, nomès volen recuperar la seva llibertat, amb Pakistan o sense, només ésser lliures.
No es cap crim, si estimen la Terra, perquè no els la volen tornar!?
No ho entenc.
Visca la terra...Lliure!
L'Ernest, "El Tàrrega".

  • 0
  • 0

Escriu un comentari sus aqueste article