Nos quitèt dijòus passat Jean-Pierre Mocky, actor e prolific realizaire niçard, a 86 ans. Amb mai d’una seissantena de filmes realizats, nos ramentarem d'el mai que mai per sos filmes Les Dragueurs (1959), Un drôle de paroissien (1963), Solo (1969), À mort l'arbitre (1984), Y a-t-il un Français dans la salle ? (1982), Le Miraculé (1987) o Bonsoir (1994).
 
Nasquèt a Niça en 1933 al sen d’una familha d’origina polonesa, lo paire èra josieu e sa maire catolica. Lo paire aviá avançat la data de naissença de Mocky a l’an 1929 per que poguèsse prene un naviri devèrs Argeria e fugir los nazis. En fin finala, refusèron aquel viatge e la familha s’installèt a Grassa ont viurián gràcias a la fortuna de la maire.
 
Comencèt sa carrièra coma actor en 1942 al cinèma e al teatre. Venguèt celèbre mai que mai en Itàlia amb lo filme I vinti (1953) de Michelangelo Antonioni. Trabalhèt coma estagiari per Luchino Visconti e per Federico Fellini e escriguèt son primièr filme, La Tête contre les murs,  en 1959.