Bandièra01 1180x150: Comuna de Tolosa

Actualitats

Espòrt

Fotbòl. Liga 1: Montpelhièr espèra los autres

| RG1033

La seguida de victòrias s'estanca per Montpelhièr, batut sens glòria a Lorient (2-1). Bordèu arranca un punt fàcia a Nancí (2-2), e Niça trapa pas de solucion a Rennes (3-1). Marselha e Tolosa jogaràn doman.


Per Montpelhièr, capdau amb tres punts d'avança, la tresena partida de la setmana s'acabèt per una desfacha a Lorient, còla reputada dempuèi annadas per la qualitat de son jòc, e cranhuda per son camp sintetic. Aquí un topic repetit tant per observador coma per jogadors: "Lorient es lo bon lòc per esprovar sas qualitats".  Arser, lo test foguèt negatiu pels eraureses, per manca d'ambicion e d'implicacion. Ne caliá mai fàcia a una còla bretona confla d'estrambòrd, darrièr un Kevin Monnet-Paquet de pas tenir. Las estelas montpelhierencas s'i ensagerèn, un pauc, sens balhar l'impression d'abordar seriosament aquela partida, pasmens. E arribèt çò qu'a cada minuta se podiá endevinar un pauc mai: Bedimo marquèt contra son camp (69a minuta). Campbell, en responsa, trapèt finalament la gàbia (77a minuta) après s'i èsser ensajat maites còps. Giroud, en marcar son vinten gòl de la saison, balhèt un pauc d'esper (2-1) mas en van. Montpelhièr daissa lo parat de s'eslonhar dels parisencs, que s'arrosseguèron a Aussèra (1-1). Tant pis, mas la corsa finala pel títol serà peluda.

 
Bordèu, dins lo dòl
 
Novèla cara pels girondins: arser, se faguèt pas pròva d'una qualitat estrambordanta de jòc, Bordèu mostrèt una volontat que se lor coneissiá pas mai. Dubriguèren la marca, d'ora e contra lo ritme de la partida, per un Gouffran plan plaçat dins l'esquina de la defensa. Mas l'incapacitat de tenir lo balon, recurrent dempuèi de meses, marquèt encara la partida bordalesa. Al tornar de la pausa, los de Nancí rampelavan, abans prene l'avantatge a la 72a minuta. S'aubirava ja una novèla desfacha, quand los girondins saupèron finalament sortir un darrièr quart d'ora de bona qualitat, amb fòrça volontat. E aquò paguèt: Tremoulinas tirèt son penalti amb fòrça a la 90a minuta, per egalizar après una granda pression dels marin e blanc. Bordèu torna amb un ponch. Solide, semblan blocats dempuèi un mes. Mas arser, lo public se poguèt rassegurar un pauc, e los jogadors mostrèron una cara qu'avián plan esconduda aquelas darrieras setmanas.

 
Niça sens recorses
 
Dins un estadi de la Rota de Lorient void e en susmauta contra la direccion del club, los niçards tenguèron pas l'opausicion frent a Rennes, un pretendant a l'Euròpa. Feret dubriguèt la marca pels bretons a la 23a minuta, abans de balhar la bala de 2-0 a Doumbia, a la pausa. Lo Gim, incapable de reagir tota la primièra tempsada, trobèt pas tanpauc de solucion en debuta de segond periòde, e la reduccion del marcador venguèt d'una contra-ataca de Clerc a la 59a minuta. Après aquela capitada, los niçards tornèron prene fisança, un pauc. A la contra-ataca, saupèron menaçar los bretons, mas sens transformar aquela volontat en gòl. Piéger, Pitroipa tuèt la partida, a la 82a minuta. Sens calmar los suportaires de Rennes, que demandèron la demission de Patrick Le Lay amb fòrça. Arser, Niça n'aviá pas la qualitat mentala per tenir fàcia al cinquen, e las vint minutas mai investidas que mostrèron en segond periòde n'èran pas pro per tornar a Niça amb una milhora resulta.
 


 EquipaPtsJGRPBpBcDif
1Montpelhièr HSC 66 32 20 6 6 59 31 28
2 París SG 64 32 18 10 4 57 34 23
3 LOSC Lilla Metropòli 59 32 16 11 5 60 36 24
4 Olimpic Lion 53 31 16 5 10 49 38 11
5 Stade Rennais 51 32 14 9 9 44 36 8
6Tolosa FC 50 31 14 8 9 32 28 4
7 AS Sant Estève 50 32 14 8 10 40 36 4
8Girondins de Bordèu 43 32 10 13 9 38 36 2
9 Evian TG FC 42 32 11 9 12 46 46 0
10Olimpic de Marselha 40 31 10 10 11 38 35 3
11 AS Nancy Lorraine 40 32 10 10 12 33 39 -6
12 Valenciennes FC 37 32 10 7 15 31 39 -8
13 FC Lorient 35 32 8 11 13 30 41 -11
14OGC Niça 34 32 8 10 14 33 39 -6
15 Dijon FCO 34 32 9 7 16 37 52 -15
16 FC Brest 33 32 6 15 11 28 32 -4
17 SM Caen 33 31 8 9 14 33 44 -11
18 FC Sochaux-Montbéliard 33 32 8 9 15 33 48 -15
19 AC Aiacciu 33 32 7 12 13 33 54 -21
20 AJ Aussèrra 28 32 5 13 14 37 47 -10
 

Clarmont pèrd una cartocha
 
Dins la corsa a la pujada, la desfacha d'agèr daissa un gost amar. Contra lo quinzen del classament, a casa, caliá ganhar. Çò que los auvernhats poguèron pas far. Maugrat la dubertura rapida del marcador (un gòl contra son camp de Couturier), èra impossible de se'n sortir, divendres. En quatre minutas au mièi de la segonda tempsada, l'afar èra plegat (1-2). Fòra de sa victòria contre Le Havre, lo 30 de març, Clarmont s'es pas impausat dempuèi genèr.


Istre, lo rampèl dins la pèl
 
Seria de sièis rampèl en cors pels provençaus. Sovent dominat per una equipa de Tròias sens granda reussita, Istre auriá pogut far melhor, amb un pauc d'escasuda. Mas se saupèron trobar tròp paucs de passatges fins a la gàbia dels adversaris, per esperar mai qu'aquel rampèl.

 
Arla-Avinhon fòrça lo passatge
 
Caliá pas partir tròp d'ora de l'estadi Gaston Petit de Châteauroux, que quasi tot s'i decidiguèt a las dètz darrièras minutas. Los provençaus dubriguèron la marca, pel tolosenc Thomas Ayasse (10a minuta). Kevin Dupuis, l'atacant marselhés de Châteauroux, egalizèt tot juste après una accion mancada per Mohammed Yatarra, sol contra lo portièr castelrossin (84a). Mas lo Maurice Dale trapèt la gàbia, dins lo temps suplementari, per tornar amb los tres ponches d'una polida victòria a casa.

 
Mónegue encadena las victòrias
 
Aquel encontre sentiá a passats mai glorioses. Dempuèi 1957, l'estadi Saint-Symphorien a ja arcuelhut 34 còps l'ASM, en primièra division. Se caliá tanben remembrar de las grandas annadas 1980, que tant Mètz com Mónegue jugavan en copa d'euròpa cada an, o quasi. Arser l'enjòc èra mai modèste, que las doas còlas lutan per demorar en L2. E los monegasques saupèron trobar las falhas. Giuly d'abòrd (6a minuta, sus un cafolhatge dels lorens), puèi Salli en de partida, e entre temps una dominacion puslèu messina, sens concretizacion. Los monegasques son en bona via per se mantenir, e a  uech ponches de la pujada.

 EquipaPtsJGRPBpBcDif
1 SC Bastia 62 32 18 8 6 53 28 25
2 Stade de Reims 51 31 14 9 8 44 31 13
3 ESTAC Troyes 51 32 13 12 7 37 33 4
4Clarmont Foot 49 32 13 10 9 41 33 8
5 Sedan 48 32 12 12 8 48 42 6
6 Tours FC 45 32 12 9 11 36 36 0
7 FC Istre 44 32 11 11 10 41 38 3
8 Châteauroux 44 32 13 5 14 34 44 -10
9AS Mónegue FC 43 32 10 13 9 35 40 -5
10 FC Nantes 42 31 11 9 11 39 34 5
11 RC Lens 41 32 10 11 11 38 42 -4
12 EA Guingamp 41 32 11 8 13 34 39 -5
13AC Arle Avinhon 41 32 9 14 9 32 37 -5
14 Stade Lavallois 40 32 10 10 12 40 41 -1
15 Angers SCO 40 32 10 10 12 37 39 -2
16 Le Mans 39 32 10 9 13 31 32 -1
17 Havre AC 37 32 8 13 11 30 30 0
18 FC Metz 37 32 9 10 12 24 33 -9
19 US Boulogne CO 32 32 6 14 12 31 37 -6
20 Amiens SC 25 32 4 13 14 27 43 -16

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Matieu Castel Amians
3.

#2 Lei noms que donèri ( Valencianas, Rems, Amians, Tors, etc...) son aquelei qu'atrovam sus la wikipèdia occitana. Bessai un bòn biais per demorar coerents amb totei leis aisinas que podem aver sus lo web occitan ?

Parierament, leis equips bretons an un nom breton (Stad Roazhon, Klub Football an Oriant-Kreisteiz Breizh, Stad Brest - e pas FC Brest !)

Causida pas evidenta, d'efiech...

(e per vos dire lo verai, metriau "Girondins" tot solet per Bordèu e "Olimpic" tot solet per Marselha, que d'Olimpic, ne l'a qu'un en França e en Occitània !!!)

  • 2
  • 0
Jornalet Occitània
2.

Los criteris de Jornalet pels noms de las vilas son: en occitan s'an un nom tradicional en occitan (ex. París, Grenòble, Lion, Venència, Bagdad, Lhèida, Aquisgran...); e en la lenga autoctòna s'an pas cap de nom tradicionalament en occitan (ex. Aiacciu [aviás rason], Neully-sur-Seine, Gernika...). Es lo meteis critèri qu'es estat emplegat per apelar las esquipas de fotbòl. Ça que la, es un subjècte que nos cal plan lo parlar amb los sabents per ne saber lo lor vejaire. Tot just sèm a començar de bastir lo nòstre lengatge jornalistic. Mercés plan pels compliments. Messatges aital balhan de vam per contunhar.

  • 4
  • 0
Matieu Castel Amians
1.

Una remarca : lo solet nom emplegat per la direccion de l'AC Ajaccio es ara en còrso (maugrat l'adreiça internet oficala ! ) : AC Aiacciu

http://www.ac-ajaccio.com/

Se que non, Valencianas, Rems, Amians, Tors, etc... en occitan !, partent que metez Aj Aussèrra(s), faudria occitanizar lo tot ò laissar lei equips francés en francés.

Flame article coma que vague, fa plaser de liegir d'actualitat fotbalistica en occitan, emai se coma marselhés, me fa gaire gaug d'aquesta passa !

  • 4
  • 0

Escriu un comentari sus aqueste article