Mercés a las gestions del jornal breton 7Seizh, los acòrdis de cooperacion amb de mèdias internacionals creisson.

A l’ora d’ara, son ja onze los jornals internacionals amb los quals Jornalet a un acòrdi de cooperacion: Nationalia (Païses Catalans), Vilaweb (Païses Catalans), 7Seizh (Bretanha), Arredol (Aragon), Le Quebecois (Quebèc), Galicia Confidencial(Galícia), Caraib Creole News (Guadalope), Den Draed (Frandra francesa), Tamazgha.fr (Azawad e Berberia), Actu Kurde (Curdistan) e Il Minuto (Sardenha).
 
Amb aqueles acòrdis, en mai dels escambis d’informacions, Jornalet poirà reprodusir liurament los contenguts d’aqueles jornals web. E aqueles jornals d’aquí, a l’encòp, balharàn d’informacions d’Occitània dins lors païses e en lors lengas, mercés a las informacions que prendràn liurament de Jornalet.
 
 
Al nivèl nacional
 
Amb los mèdias nacionals, cal remembrar que Jornalet fa partida de la Federacion Interregionala dels Mèdias Occitans (FIMÒC); tanben Jornalet e L’Infòc escàmbian d’esfòrces, de trabalh e d’informacions amb La Setmana (e d’autras publicacions de Vistedit), e mai amb Ràdio País, Ràdio Occitània, Ràdio Lenga d’Òc Narbona, Paraulas en Òc, Ràdio Albigés, Ràdio Copa Santa (Radio Coupo Santo), Radio Périgueux, Radio Val Pireneos e las emissions occitanas de Radio Beckwith.