Bandièra01 1180x150: Comuna de Tolosa

Actualitats

Situacion insuportabla sus l’Open Arms

Òscar Camps publiquèt ièr un vidèo sus Twitter que mostrava la situacion de tension e de desespèr que vivián los migrants sul naviri

| ACN/Open Arms
La situacion sus l’Open Arms es insuportabla. Fa 18 jorns que lo naviri espèra lo permés del govèrn italian per desembarcar los migrants socorreguts. Ara son davant l’illa de la Lampedosa, autorizats d’i èsser per la justícia italiana, mas contra la volontat del ministre dels afars interiors, Matteo Salvini, qu’a entamenat una crosada contra los migrants e los vaissèls umanitaris. Lo director de l’organizacion umanitària catalana ProActiva Open Arms, Òscar Camps, publiquèt ièr un vidèo sus Twitter que mostrava la situacion de tension e de desespèr que vivián los migrants sul naviri, e en apelant los dirigents dels principals estats europèus, se demandava se Salvini aviá de besonh de mòrts per sa campanha politica e fa una crida als presidents dels principals.
 
“Fa de jorns qu’avertissèm d'aquò. De mond dins l’aiga, de batèstas, de violéncia, de panica, de crisis d’ansietat. Que cal mai, de mòrts? Los que son pas mòrts en mar devon morir a bòrd de l’Open Arms? Espèri que lo ministèri public agirà sul pic, es insuportable”, çò ditz Camps.
 
Dins lo vidèo se pòt veire un grop de migrants que sautan dins l’aiga per ensajar d’arribar eles meteisses en Itàlia del temps qu’un grop de socorristas sautan darrièr per los arrestar. Tanben se pòt veire de crisis d’ansietat e de conflictes entre personas que son sus la nau mentre que l’esquipatge ensaja de los conténer.
 
 
 
Lo primièr ministre espanhòl prepausa ara lo pòrt d’Algeciras
 
Mentretant, lo president del govèrn espanhòl en foncions, Pedro Sánchez, prepausèt ièr a l’Open Arms lo pòrt d’Algeciras (Andalosia) per desembarcar los 107 migrants que son totjorn a bòrd de la nau. L’Open Arms o a refusat pr’amor que seriá un viatge de sièis jorns que poirián pas suportar, e espèran que lo minstèri public italian lor permetrà de desembarcar en Itàlia.
 
 
Braç de fèrre amb Salvini
 
L’Open Arms arribèt divendres davant las còstas de la Lampedosa après un braç de fèrre entre los activistas umanitaris e las autoritats italianas. Salvini a ensajat d’empedir l’arribada de l’Open Arms en dictant un decret que menaçava d’arrestar e d’impausar de multas d’un milion d’èuros a las organizacions umanitàrias que lors vaissèls intrèsson dins las aigas italianas. De son latz, la còla de l’Open Arms pausèt un recors davant la justícia e, dimècres passat, un tribunal administratiu de la region de Laci suspendèt per precaucion lo decret de Salvini a causa de “la situacion de gravetat e d’urgéncia excepcionala”.
 
Fa qualques jorns, avián pogut menar a tèrra dos nenets de 9 meses amb de problèmas respiratòris. Aquesta dimenjada, an pogut desembarcar los menors.
 
Sièis estats europèus —Alemanha, Espanha, França, Luxemborg, Portugal e Romania— an comunicat qu’aculhirián los migrants.
 
Salvini reagiguèt a la decision dels jutges amb colèra e assegurèt que i aviá “un plan” per “recular e dobrir los pòrts italians per qu’Itàlia tornèsse èsser lo camp de refugiats d’Euròpa”. E mai menacèt de tornar signar un decret lèu-lèu perque el vòl pas èsser “complice” dels “trafegaires”.

 
 
 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article