Bandièra01 1180x150: País Invisible

Actualitats

La Mediterranèa: la fòssa de 17 755 personas de 2014 ençà

L’analista de donadas Joe Brew mòstra sus una mapa de la Mediterranèa las 17 755 personas mòrtas dempuèi 2014 quand ensajavan d’arribar en Euròpa

Dins las darrièras sièis annadas, environ 18 000 personas son mòrtas en ensajant d’arribar en Euròpa en traversant la mar Mediterranèa. En majoritat fugissián la pauretat, la violéncia e la terror e cercavan de vidas melhoras per eles, per lors familhas e per lors enfants. Fòrça d’eles èran d’enfants.
 
Traversèron de païses, sovent de continents, sens res mai qu’una saca sus l’esquina o un enfanton entre los braces. Moriguèron dins las meteissas aigas ont passam las vacanças, de còps fàcia a la plaja. La màger part se neguèron. Qualques unes foguèron esclafats o estofats per la panica quand las barcas s’enfonzavan. N’i aguèt que moriguèron d’ipotermia, après passar d’oras dins l’aiga, en esperant una operacion de socors qu’arribèt pas jamai. D’autres se perdèron en mar, sovent en sucombissent a la desidratacion o a la fam après qualques jorns de deriva.
 
Una granda partida de las analisis de donadas es una agregacion, es a dire la combinason d’elements per tresmudar de donadas individualas en un relat conjonch. Pasmens, dins lo cas dels mòrts en Mediterranèa es complicat de conclure quicòm de significatiu d’una causa talament innecessària e sens cap de sens. Es malaisit, amb o sens donadas , de balhar un sens a un Mond ont de desenats de milièrs de mòrts se pòdon considerar coma una situacion “legala” mentre que lo socors de las personas en nauta mar es tractat coma un “crime”. En mai d’aquò, l’agregacion de donadas ten lo perilh de tresmudar los èssers umans en simplas chifras e de damatjar l’efièch emocional que la mòrt d’una persona deuriá aver sus nosautres.
 
Per tant, aquesta “analisi” serà pas una analisi absoluda. I expausarai solament la visualizacion de las donadas sus una mapa. Una mapa a pas d’agregacion, ni paraulas, ni interpretacions. I a sonque un ponch per cada persona qu’es mòrta en Mediterranèa en tot arpatejar per arribar en Euròpa, de 2014 ençà. La mapa es aicí.
 
I a 17.755 ponches. 17.755 umans. 17.755 mòrts.
 
De còps, i a pas besonh de mots.
 
 
Detalhs
— Donadas non tractadas de https://missingmigrants.iom.int/.
— Ponches aleatòriament “nervioses” dins  0.08 *lat/*lng per evitar de cavalcaments.
— Tot lo còde es disponible sus https://github.com/joebrew/vilaweb/tree/master/analyses/migracio.
— Mapa sus http://joebrew.net/mapa.html.
 
 
 
 
Joe Brew
Article publicat originàriament en catalan sus VilaWeb

 
 
 
 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

S'a de dir clarament que s'els salva per no morir aufegats, però que puei s'els retornarà a sos paisos d'origen. Se no se diu clarament per los medias europeus açò, no s'acabarà mai e seguiran venint mai e mai e morint aufegats mai e mai gent. Es aital. S'a de tenir coneissament e dir la veritat,e l'UE dels banquiers no ne ten.

  • 2
  • 4
Joan de Lugio Concorezzo
1.

La Mediterranèa : la fòssa de 17 755 personas de 2014 ençà… Aquò pausa una legitima indignacion que sonque l'egoïsme primari ne pòt venir contestar la fondamenta.

Mas pausa al mens doas autras questions implicitament.

1) Foguèssen umanament — eticament — aculhits totes los umans qu'atravèrsan la mar nòstra, sistematicament, a quin ritme, quina frequéncia arribarián alavetz ? Pausi la question dins la mesura que la responsa — quina que siá — proven en granda partida del fait — normal o non ? — que d'una part e de l'autre de la paret invisibla que dessepara Euròpa de la rèsta del mond, i a plan tròp de desequilibri dins lo benestar. I agèsse tan de benestar d'un costat coma de l'autre, non i auriá ges ni mica aquesta afluéncia cap a Euròpa (o USA), ne soi a pauc près segur…

2) Quin es lo putanhièr de sistèmi qu'entreten aqueste desequilibri injustificable d'un territòri a un autre, a l'avantatge de qualques unes al despens del mai grand nombre ? Totes los umans son egalament umans e n'an un egal dreit fondamental al benestar. Lo meriti es un mite inventat per los qu'aqueste desequilibri avantatja, ja que lo mite del "liure arbitri" que li es consubstancialament ligat non a cap fondament scientific de ges de biais : es una supersticion malsanitosa, inventada per desencusar ipocritament e falsièrament totes los egoïsmes circonstancialament avantatjats.

Çò que me confla seriosament es que sempre parlam de socórrer aqueste paure mond refugiat — urosament ! — mas jamai non se parla de ges de biais del combat necessari e despietadós contra lo sistèmi impausat a totes qu'entreten aquestas inegalitats territorialas e que buta tant de paure mond cap a nòstra compassion o — lo mai sovent — cap a nòstra indiferenta crudelitat.

  • 21
  • 1

Escriu un comentari sus aqueste article