Bandièra01 1180x150: Comuna de Tolosa

Actualitats

InternacionalPolitica

Los Estats Units desplegan lors tropas en Arabia Saudita

Iran interprèta aquel movement e las nòvas sancions economicas coma una volontat de far montar lo conflicte e avertís que tota ataca aurà una responsa

Los Estats Units installan lor armada en Arabia Saudita per protegir las installacions petrolièras e anóncia de nòvas sancions economicas contra Iran, que l’acusan de sosténer la milícia huti que se defend en Iemèn e qu’ataquèt fa qualques jorns un sit petrolièr saudian.  Lo desplegament militar estatsunidenc l’aviá demandat l’Arabia Saudita, e aqueste assegurarà la proteccion aeriana de las installacions petrolièras e la defensa antimissils.
 
Ara per ara, sabèm pas lo nombre de  militars que los Estats Units van installar aquí, mas lo Pentagòn assolida que serà un desplegament moderat.
 
De son costat, Teheran, que rebuta d’aver sostengut l’ataca del sit petrolièr, a interpretat las sancions e lo desplegament de las tropas coma una volontat de far pojar lo conflicte e avertís que tota ataca recebrà una responsa.
 
 
Crida d’Iran als païses de la region
 
D’autre caire, lo president iranian, Hassan Rohani, a fach una crida als païses del golf Persic per far un front comun davant “l’inseguretat” que los Estats Units e Israèl representan per la region.
 
“Estendèm la man de l’amistat e de la fraternitat als païses vesins e sèm quitament dispausats a desmembrar lors errors del passat perque la situacion actuala fa que los enemics de l’islam e de la region, es dire los Estats Units e lo sionisme, vòlon profechar de la division entre nosautres”, çò a dich.
 
Rohani a d’efièch anonciat un plan de cooperacion regionala per garentir la seguretat dins lo golf Persic. A mai, a anonciat que presentariá aquesta setmana a l’Assemblada Generala de l’ÒNU un plan de cooperacion regionala nomenat “Esperança” per garentir la seguretat de la zòna.
 
 
 


 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article