Bandièra01 1180x150: Comuna de Tolosa

Actualitats

InternacionalPolitica

Egipte: qualques milièrs de personas manifèstan contra lo regim d’As Sisi

Segon Al Jazira, i a agut de protèstas dins una ochantena de vilas, dont lo Caire, Giza, Mahalla, Alexàndria e Suèz

Qualques milièrs de personas an agut lo coratge de manifestar per las carrièras d’Egipte per protestar contra lo regim e exigir la fin de la presidéncia del marescal Abd Al Fatah As Sisi, que govèrna lo país après lo còp d’estat que lo faguèt en estiu de 2013. La manifestacion s’es tenguda mentre qu’As Sisi èra a Nòva York a l’Assemblada Generala de las Nacions Unidas.
 
Las protèstas seguissián la crida de l’entrepreneire Muhammad Ali, en exili en Catalonha. Per mejan dels rets socials, Ali demandèt al mond que sortiguèsson manifestar per carrièras après una partida de fotbòl al Caire. L’entrepreneire exiliat acusa As Sisi de corrupcion del temps qu’assegura qu’es l’armada que contraròtla l’estat mentre que lo pòble patís de mai en mai la pauretat.
 
Segon Al Jazira i a agut de protèstas dins una ochantena de vilas, dont lo Caire, Giza, Mahalla, Alexàndria e Suèz. De fach, aquela darrièra vila portuària a viscut doas nuèches d’afrontaments entre de centenats de manifestants e la polícia, que lor a lançats de gases lacrimogèns e quitament de municions realas. An detengut de centenats d’activistas.
 
Al Caire, la preséncia policièra es fòrça granda, mai que mai sus la Plaça de Tahrir, que foguèt lo centre de la revolucion qu’en 2011 reversèt lo dictator Hosni Mubarak. De fach, divendres passat s’i tornèt ausir lo conegut lèma “lo pòble vòl la casuda del regim”. Aquí, la polícia ataquèt tanben los manifestants.
 
 
Repression de fèrre e violacion dels dreches umans
 
Dempuèi l’an 2013, As Sisi governa lo país amb una man de fèrre, après dirigir un còp d’estat contra lo president islamista Muhammad Mursi, un dels caps dels Fraires Musulmans. Mursi aviá ganhat las eleccions democraticas de 2011, tengudas après la casuda de Mubarak.
 
Justament, los islamistas son estats una de las tòcas de la repression qu’Al Sisi a entamenada contra la dissidéncia politica. A mai, jos sa dictatura an encarcerat de milièrs d’opausants e an enebit las manifestacions. D’associacions que defendon los dreches umans denóncian la desaparicion d’activistas e la practica de torturas dins las presons.
 
Precisament, coma o denóncian los correspondents dins aquel país, lo regim ensaja de compelir lor trabalh.
 
 
 
 
 
 
 
 
 
 
 
 


 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Los germans musulmans era un govern d'assassins que mataven a los coptes. Afortunadament aquel govern caiguet per lo cop del general Mussarrat.

  • 2
  • 0

Escriu un comentari sus aqueste article