Bandièra01 1180x150: Comuna de Tolosa

Actualitats

InternacionalLengaPolitica

Brussèlas: an portat l’occitan al còr d’Euròpa

La Generalitat de Catalonha, en collaboracion amb lo Conselh General d’Aran e l’ÒPLO, a parlat de la recuperacion de l’occitan a l’ocasion del Jorn Europèu de las Lengas

Estève Cròs, Maria Vergés
Estève Cròs, Maria Vergés
A l’ocasion del Jorn Europèu de las Lengas, la delegacion de la Generalitat de Catalonha envèrs l’Union Europèa a portat l’occitan a Brussèlas. Un eveniment s’i organizèt ièr amb la collaboracion del Conselh General d’Aran e de l’Ofici Public de la Lenga Occitana. Los diferents parladisses an soslinhat los prètzfaches dels diferents govèrns regionals (Occitània PM, Aran e Catalonha) per refortir la lenga occitana.
 
L’eveniment tenguèt la participacion del ministre de la Generalitat en exili, Lluís Puig, que de Brussèlas estant dirigís lo Programa pel Desvolopament de Projèctes Culturals d’Encastre Internacional. Puig expliquèt las accions per l’occitan qu’an entamenadas lo Conselh General d’Aran e la Generalitat de Catalonha.
 
La representanta de la Generalitat envèrs l’UE, Meritxell Serret, mandèt un messatge a l’Union Europèa per que las institucions “faguèsson tot çò possible” pel desvolopament de l’occitan.
 
 
De “solucions imaginativas” en Aran
 
Quant a el, lo sindic d’Aran, Francés Boya, diguèt que caliá trobar de “solucions imaginatives” per que la lenga subrevisquèsse a la mondializacion e a la “pèrda de cultura populara”. Dins aquel sens afortiguèt que caliá que “catalans e occitans trabalhèssem amassa”, e tanben “damb totes es lengües que luten entà subreviuer en aguest sègle”. De son costat, la vicesindica d’Aran, Maria Vergés, expliquèt lo prètzfach del govèrn d’Aran amb la Generalitat de Catalonha “entà matier er aranés viu”. Segon Vergés, malgrat los bons resultats dels sondatges, l’aranés es pas pro emplegat dins la vida vidanta.
 
 
Recuperacion de l’occitan en Bearn
 
De son caire, lo director de l’Ofici Public de la Lenga Occitana, Estève Cròs, soslinhèt los resultats positius del darrièr sondatge dels Pirenèus Atlantics que mòstra que i a una recuperacion de la lenga. “La generacion jove emplega mai l’occitan que la generacion mai adulta”, çò diguèt en remarcant qu’èra un “resultat encoratjant”.
 
 
Occitània-Euròpa per la promocion de la pluralitat e la diversitat
 
La session la clavèt Yannick Proto, director de la representacion en Euròpa de la region qu’a pres lo nom d’Occitània, que soslinhèt que la construccion europèa deviá “respectar e promòure la pluralitat e diversitat lingüisticas”.
 
 
 


Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Arnaud Vilanòva
6.

A Brussèlas, disètz qu'an portat l’occitan al còr d’Euròpa. Mas lo còr d'Euròpa es la banca de Frankfurt am Main, la BCE.

  • 5
  • 2
francesc palma
5.

Una presentacion de l'Occitan a Brusel·las es bona, qu'es demane a las autoritats europeas qu' es faci lo possible per ajudar a la lenga d'Oc es positiu, mas cal seguir amb aquesta linia per parlar com es pot ajudar. Cresi que i a moltes maneras d'ajudar la lenga dels trobador: los medias, exigir la cooficialitat, subvencions, TV, radios,ajudas economicas a entitats culturalas.

  • 5
  • 0
Hilh
4.

#3 Aunestament non vei pas tròp tanpòc çò qui l'OPLO averé hèit ençà endà desvolopar lo gascon e l'occitan pr'aquò qu'an ua pièla d'atrunas analitics endà conéisher la situacion. Qu'an publicat ua sintèsi sus la navèra aquitana e l'occitània on s'i pòt léger las chifras de l'occitan pr'aqueths territòris qui deurém tots aver en cap

  • 5
  • 0
Artigaladas Banhèra de Bigòrra
3.

Estranh de trobar l'OPLO hèit de burocrates en arrepresentacion d'Occitània, ath costat d'arrepresentants esleguits peth pòple catalan e peth pòple occitan d'Aran. L'OPLO n'a pas nada legitimitat tà parlar ath nom deth moviment occitanista e deth pòple occitan. Que mes qu'ei un organisme qui ei a tot james eth tuaire de Vistedit, La Setmana, Plumalhon e Papagai. Que i a associacions occitanistas de terrenh (Calandreta, CFPOC, INOC, La Passem, ...)qui pòden relatar e rebàter miélher era realitat deth tribalh, çò qui avança, çò qui hè arrèrpè e tot çò qui sobra encara. Mes interessent que sondatges.

  • 11
  • 0
Hilh
2.

E non parlèn pas briga deu tribalh de la Navèra-Aquitània?

  • 4
  • 0

Escriu un comentari sus aqueste article