Actualitats
Procès contra l’independentisme catalan: pel primièr còp un jutjament espanhòl tendrà un traductor d’occitan
Mireia Boya e l’èx-burèu del Parlament seràn jutjats a Barcelona del 19 al 22 de novembre. La deputada aranesa reclama la libertat ideologica e demanda de declarar en sa lenga
Dins son escrich de defensa, Boya exigís d’èsser relaxada e apèla als dreches fondamentals de participacion politica e de libertat ideologica. A mai, Boya demanda de “declarar en occitan” car es sa “lengua mairau”. Lo Tribunal Superior de Justícia de Catalonha a acceptat la demanda de Boya e a ordenat un servici de traduccion simultanèa d’occitan aranés. Es lo primièr còp dins l’istòria judiciària de l’estat espanhòl qu’un procès tendrà un traductor d’occitan.
Avui hem presentat l'escrit de defensa al TSJC. A banda de relació de fets, proposta de testimonis i documents i altres tecnicismes, demano declarar en occità, la meva llengua materna. pic.twitter.com/QQZ9cua4SM
— Mireia Boya Busquet (@yeyaboya) September 2, 2019
Franc de Mireia Boya, los acusats fasián partida del burèu del parlament qu’acompanhavan lor presidenta, Carme Forcadell, durant la sesilha que permetèt d’aprovar lo referendum del 1r d’octòbre de 2017.
El TSJC ha fixat data per jutjar per desobediència la mesa del Parlament. N'hem parlat amb una de els encausades, @yeyaboya#TotEsMouTV3
— Tot es mou (@totesmoutv3) September 27, 2019
@tv3cat
https://t.co/POVYjnWbIZpic.twitter.com/XtHOeNDUas
“Se volètz, vos fau perseguir tanben per rebellion”
Boya foguèt ja entenduda per la Cort Suprèma a Madrid en mai de 2018, e lo jutge remandèt son afar amb los del burèu del Parlament per que los jutgèsse lo Tribunal Superior de Justícia de Catalonha. Alara, pendent sa declaracion, Boya diguèt al jutge que li semblava pas just que foguèsse perseguida en justícia per “desobesissença” pel fach d’aver prepausat un debat al Parlament de Catalonha, mentre que la presidenta d’aquel parlament a la meteissa epòca, Carme Forcadell, èra enseguida e encarcerada per “rebellion” pel fach d’aver permés aquel debat. Lo jutge Pablo Llarena respostèt alara a Boya: “Se volètz, vos fau perseguir tanben per rebellion”.
Quant a ela, en aquel temps nos contèt sa convèrsa amb lo jutge: “È exprimit es mèns dobtes sus era parcialitat de tot aguest procès juridic. Es interlocutòries an indicis de parcialitat. E li è dit que demori damb resignacion ua senténcia que creigui que ja ei escrita. De hèt, era interlocutòria se semble fòrça ad aguesta senténcia e li è dit qu’aguest jutjament ei teatre, ei ua pantomima politica, e qu’eth vertadèr jutjament serà a instàncies internacionaus. L’occitanisme mostrèt son sosten a la politiciana aranesa.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
La judicatura espanhola està en temps de las cavernas de Paca la Culona. Totas las vulneracions dels Drets Umans s'an de portar al Conselh d'Europa,d'aquesta manera la judicatura espanhola amb aver de tractar amb jutges europeus n'aniran aprenent.
Francament, ieu preferissi lo camin de l'exili en luòc d'èsser jutjat en occitan... L'estat serà repressiu de tot biais! Mas bon, me sembla una bona causa de se poder exprimir en occitan aranés e aital far de resson mediatic e mostrar que l'occitan existís! N'i surt de monde qu'ausirà la lenga d'òc pel primièr còp! Almens, la Mireia capitarà de segur passar a l'istòria!
Aguèsse agut un traductor d’occitan a l’epòca, benlèu Gaston Dominici seriá pas estat condemnat. Mas, quitament ara, anatz demandar aquel drech a l’administracion francesa !
Adiu Mireia !
Non te herèi cap arrecomanacions, ja que sabes milhor que arrès çò que vòs, çò que cau entath país, tà on e com i vòs anar...
Dider-te bon coratge ? Que n'as entà d'ensenhar aths autis...
Alavetz demorarèi de tot còr que tot t'escaije de plan, que t'ac desiri !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari