“Un títol gròs en primièra pagina... Estranhs ortalièrs dins l’òrt partejat!”...  Escrivètz la seguida abans lo 6 de febrièr de 2020!

“Un títol gròs en primièra pagina... Estranhs ortalièrs dins l’òrt partejat!”...  Escrivètz la seguida abans lo 6 de febrièr de 2020! Las bibliotècas del Lector del Val (associacion de bibliotècas de Lauragués, dins lo sud-èst tolosan) organizan lor XXIIn concors de novèlas, dobèrt a totes e a gratis, fins al 6 de febrièr de 2020.
 
Per l’ochena annada, los escriches en lenga occitana son benvenguts gràcias a la collaboracion de l’associacion Fèsta d’Òc e de la calandreta de Castanet Tolosan.
 
Lo concors compren quatre categorias: primari, segondari, licèus, adultes (los tèxtes collectius son permeses se fan partida de l’ensenhament de tota una classa). Lo tèxt deu necessàriament començar amb la frasa çai sus. Lo genre demòra liure: fantastic, policièr, sciéncia-ficcion, istoric, romanesc, aventura, etc., o pas brica de genre que siá. Totas las variantas de la lenga d’òc son benvengudas, a carga pel participant de passar l’incipit dins sa varianta pròpia.
 
Se pòt tanben participar en francés, a partir de la frasa: “La nouvelle s’étale en une du journal... Drôles de jardiniers dans le potager partagé!”
 
La remesa dels prèmis se debanarà lo 30 de mai de 2020 a la bibliotèca de Montbrun de Lauragués, e la remesa de las rejonchas de novèlas als autors es prevista per octòbre de 2020 al centre de congrèsses de Diagora de Labeja, dins l’encastre del festenal Scientilivre.
 
Un CD àudio dels melhors tèxtes occitans serà editat en mai de l’edicion del libre.
 
Per mai d’entresenhas o per obténer lo reglament: info@lecteurduval... o al telefòn +33(0)5 61 00 51 16. O sus la pagina: www.lecteurduval.org/310-concours-nouvelles.html, ont se fa tanben l’inscripcion.
 
 
 
Annie Proudom