An panat lo tresaur de la catedrala d’Auloron. Los panaires intrèron dins la nuèch de dimenge a diluns en desfonzant una de las pòrtas de la glèisa amb una veitura-bosson, çò rapòrta La Républiques des Pyrénées. Après esclatar la pòrta amb la veitura, que l’abandonèron sus plaça, los panaires resseguèron las grasilhas en s’apoderant d’un “tesaur d’orfebreria d’ua valor inestimabla que hè partida dera catedrau”, çò comentava Hervé Lucbéreilh, cònsol màger de la vila sus las ondas de France Bleu Bearn.
 
Sus aquela meteissa ràdio, lo capelan de la catedrala, Jean-Marc Barennes, precisava la valor del panatòri: “Qu’an pres tot çò qu’èra de petita talha, daubuns d’aqueths objèctes de culte que datan d’abans la Revolucion [francesa]. Que son objèctes sacrats que s’utilizan per exemple quan l’avesque e ven celebrar la hèsta de Sant Grat... Un panatòri d’aquera amplor qu’ei inedit”.
 
Segon los elements de la gendarmariá, qu’a dobèrt una enquista, la veitura-bosson èra esquipada d'un gròs tronc d'arbre sul davant per poder desfonzar la pòrta. Puèi, los panaires resseguèron los barròts e brigalhèron las vitras per poder accedir a la zòna ont se situavan los objèctes de valor.
 
An raubat d’objèctes de granda valor coma de calicis e ostensòris e tanben l’orfebrariá qu'a apertengut als evesques d’Auloron. D'autres objèctes son estats brigalhats e abandonats sus plaça. An pas emportat las relíquias de Sant Gran ni mai la grèpia.
 
Lucbéreilh parla d’un “prejudici considerable” e se mòstra indignat per las consequéncias financièras mas sustot perque “es pana aths abitants deth barri de Santa Maria tot un pan de lor patrimòni”. Lo cònsol tanben recordèt lo raubatòri que lo patiguèt la catedrala fa quaranta ans, que los objèctes panats se trobèron dins la botiga d’un antiquari: “Qu’espèri qu’aqueste còp se tornarà poder arrecuperar rapidament çò qu’ei estat raubat”.
 

Hervé Lucbéreilh, le maire d'Oloron, raconte pour France Bleu Béarn le vol du trésor de la cathédrale
Plus d'infos : https://t.co/cKBUVXpNzkpic.twitter.com/ANEgvSGCeZ

— France Bleu Béarn (@Bleu_Bearn) November 4, 2019

 

 

La cathédrale d’Oloron Sainte Marie attaquée à la voiture bélier, le tré... https://t.co/1ieM49j3OQ via @YouTube

— top viral info (@MarcelViral) November 4, 2019