Bandièra01 capçalera  1180x150: Botiga

Actualitats

Hong Kong: lo movement pròdemocracia a ganhat las eleccions de totes los districtes de la vila, levat un

Aqueste resultat dobrís la pòrta a l’eventuala victòria dels localistas pròdemocracia a las eleccions parlamentàrias, çò que provocariá una granda revirada de las relacions amb Pequin

| Galileo Cheng/HKFP
Lo movement pròdemocracia d’Hong Kong a vencut amplament los pròchineses a las eleccions als conselhs locals de la vila que se tenguèron la dimenjada passada. Los democrats an obtengut lo govèrn de 17 districtes de la vila, que ne ten 18. Fins ara, ne governava pas cap.
 
Aqueste resultat es mai que mai important per doas rasons. Primièrament, perque poiriá consolidar los conselhs locals coma contrapoder a l’Assemblada Legislativa, fòrtament contrarotlada pels partisans de Pequin. Mas tanben perque aqueste resultat tant extraordinari dobrís la pòrta a l’eventuala victòria dels localistas pròdemocracia a las eleccions parlamentàrias, çò que provocariá una granda revirada de las relacions amb Pequin.
 
Lo cap del govèrn de Hong Kong es elegit per un metòde fòrça complicat que vòl evitar la participacion democratica. En plaça d’una eleccion al sufragi universal dels sèt milions d’abitants de la vila, es un grop de 1200 personas qu’a drech d’elegir lo cap del govèrn. Demest aqueles 1200 vòtes, 117 revenon als conselhs de districte.
 
La question que se pausa es quina serà la reaccion de China, qu’impausèt justament aquel sistèma electoral per empachar qu’un candidat non contrarotlat per Pequin arribèsse al poder dins la vila autonòma.
 
Près de tres dels 4,1 milions de votants enregistrats an votat a aquestas eleccions, que se son tengudas sens episòdis de violéncia mas après un long periòde de protèstas socialas fòrtas e fòrtament reprimidas. La participacion es estada del 71%, e a doncas superat largament los 2,2 milions de personas que votèron en 2016 pel Conselh Legislatiu.
 
 
 
 
 


abonar los amics de Jornalet
 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Son eleccions municipalas.

  • 0
  • 0

Escriu un comentari sus aqueste article