Los ciutadans de l’Union Europèa despensan en drògas aperaquí 30 miliards d’èuros per an, çò que representa lo mercat pus lucratiu per las organizacions criminalas. Lo cannabis representa gaireben lo 40% del mercat, seguit de la cocaïna (un 31%), l’eroïna (un 25%) e las anfetaminas e l’MDMA (un 5%), segon lo darrièr rapòrt qu’an realizat ensems l’Observatòri Europèu de las Drògas e de las Toxicomanias e Europòl. Aqueste darrièr organisme avertís tanben d’una escalada de violéncia dins lo mercat de la dròga dins l’UE. Un “fenomèn significatiu” qu’a espelit en seguida dels nòus modèls de distribucion e d’un aument de l’usatge de las armas de fuòc de part de las màfias.
 
Lo rapòrt constata que la disponibilitat dels estupefasents dins l’UE contunha d’èsser “fòrça nauta” e que i a un accès mai aisit a “una granda varietat de produches de granda puretat e poténcia”. Aital, los dos organismes europèus avisan que lo mercat de la dròga es cada còp “mai connectat globalament e mai provesit tecnologicament”.
 
Dins aquel sens, las màfias esplechan las oportunitats qu’adutz lo numeric. Per exemple, se servisson cada còp mai d’Internet, del Darknet, de las aplicacions mobilas o dels rets socials per vendre de drògas.
 
Mai de produccion
 
D’autra caire, lo rapòrt atribuís tanben l’abondància d’estupefasents en Euròpa als nauts nivèls de produccion internacionals e europèus. La produccion de cocaïna en America Latina e d’eroïna en Afganistan a atenguts sos recòrds istorics, del temps qu’Euròpa es un dels principals productors de cannabis e de drògas sinteticas e, quitament, un fornidor mondial d’MDMA e d’anfetamina.