Bandièra01 1180x150: Comuna de Tolosa

Actualitats

Eth “ligam” audiovisuau dera Occitània Grana damb Aran

“Çò important ei qu’er occitan tròbe ar usatgèr e non pas qu’er usatgèr cerque er occitan”

En març d’est an passat neishec Eth Ligam Occitan (EthLO), un projècte de petiti vidèos legibles en occitan aranés entà “integrar er occitan ath lenguatge des hilats sociaus”, coma ditz Zep Armentano, ideaire e realizaire deth projècte. “Ei era manèra qu’er occitan apareishe en un miei tan quotidian coma ei era pantalha deth mobil”, çò precise. Atau, Armentano qu’a creat ua seguida de vidèos escriti en aranés damb àudios en totes es variantes dera lengua occitana jostitoladi en aqueres variantes. Er objectiu qu’ei eth de proposar as ciutadans aranesi un accès mès gran ara rèsta dera sua lengua e cultura. Se difonen sus Twitter e Facebook.
 
EthLO que presente ua seguida de filmets en format de vidèo mut o quarrat optimitzadi entà usatgèrs qu’empleguen eth telefòn mobil. Un format plan freqüent enes hilats d’ençà de 2015 gràcies ara sua sintaxi e concision des messatges. Son vidèos cuerti e dirèctes que pòden consumir-se en quina situacion que sigue en tot prescindir, se cau, der àudio en mètro, en autobús, en trabalh...
 
Damb aquera naua sòrta de vidèos informatius, EthLO que cerque d’apropar-se ath public a trauès des hilats sociaus d’usatge jornalièr entà atrèir un interès espontanèu quitament quan òm non pense a informar-se sus tèmes occitans. “Çò important ei qu’er occitan tròbe ar usatgèr e non pas qu’er usatgèr cerque er occitan”, çò precise Armentano.
 
Eth projècte ei creat damb ua identitat pròpria e hè partida dera ADÒC, associacion qu’amie a bon tèrme Jornalet e #aranésòc, ua emission setmanèra en occitan sus era television de Barcelona Betevé. Compde damb eth sosten deth Departament de Cultura dera Generalitat de Catalonha.
 
Eth Ligam Occitan se presentarà eth 8 de hereuèr en Margaridas (Costièra de Nimes) en encastre deth hestivau Rescontre, de vidèo amator en occitan.
 
 
 
 
FM

 
 
 
— Facebook: facebook.com/ethLigamOc
— Twitter: @ethligamoc
 
 
 
 
 
 
 
 
 
 
 
 
 
 
 
 
 
 
 


 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

De los 17 videos curts qu' i a posats, cap parla dels trobadors. Un oblit o pietge una pauca consideracion de l'importancia Europea que tengueren. Cal pas jamai se n'oblidar de las causas bonas qu'a tengut la nostra lenga e cultura.

  • 1
  • 0
francesc palma
1.

Una bona maniera de comunicar-se aisidament amb lo gran public, e de poder-li dire amb pauques paraulas temas importants culturals. Una bona pernsada que segur trobarà lo public e aqueste a voltas pas acostumat a l'Oc es podrà assabentar de la vida culturala occitana dolçament. Los trobadors feian unas cançons curtas facils de comprene, mas que per son interés arribaren a tota Europa.

  • 1
  • 0

Escriu un comentari sus aqueste article