Bandièra01 1180x150: Comuna de Tolosa

Actualitats

Lo president del Parlament Europèu a exigit de las autoritats espanhòlas qu’executen la senténcia de la Cort de Luxemborg

David Sassoli reconeis Oriol Junqueras coma eurodeputat elegit amb immunitat e demanda als servicis juridics de l’eurocambra d’esclarzir la situacion de Carles Puigdemont e de Toni Comín

Lo president del Parlament Europèu, David Sassoli, a exigit de las autoritats espanhòlas qu’executen la senténcia de la Cort de Justícia de l’Union Europèa en Luxemborg que reconeis que l’elegit e presonièr politic catalan Oriol Junqueras ten l’immunitat coma eurodeputat. O diguèt ièr, qualques oras après que foguèt publicada la senténcia dins una sesilha que comencèt un pauc tard justament pr’amor que s’analisava aquel verdicte.
 
Sassoli comencèt la sesilha , d’efièch, en parlant d’aquela question, mentre que qualques deputats europèus cridavan. A mai, demandèt tanben als servicis de l’eurocambra qu’analisèsson los efièches d’aquela senténcia sus la configuracion del Parlament, es a dire sus la reconeissença coma eurodiputats dels elegits catalans en exili Carles Puigdemont e Toni Comín.


Enfin, Sassoli concluguèt en avertissent los parlamentaris europèus qu’acceptariá pas cap de discussion sus l’aplicacion del reglament de la cambra sus aquela question:
 
“Uèi, la Cort de Justícia de l’Union Europèa a prononciat una senténcia sus l’afar Junqueras i Vies. Es una senténcia fòrça importanta qu’afècta la composicion de l’institucion. Lo tribunal s’es prononciat en disent que lo mandat proven del vòte dels elegeires e a dich qu’una persona proclamada aquerís la condicion de deputat e gaudís de proteccion e d’immunitat”.

 

Puèi, tornèt afortir sas paraulas sus Twitter:
 
A mai, Sassoli levèt de ser l’enebicion d’intrada dins l’institucion qu’aviá impausada a Puigdemont e Comín après la reactivacion espanhòla del mandat d’arrèst europèu contra eles en octòbre passat.

 
La Comission se’n lava las mans
 
Mentretant, a Brussèlas un pòrtavotz de la Comission Europèa volguèt pas assumir cap de responsabilitat sus aquel afar e diguèt que veniá a la Cort Suprèma espanhòla e al Parlament Europèu d’i respondre. E malgrat la revirada judiciària que l’a significada aquela senténcia, la Comission contunha de defendre lo foncionament de l’estat de drech en Espanha.

De ser, de milièrs de personas s’amassèron davant lo sèti de la Comision Europèa a Barcelona. D’un caire, protestavan contra lo fach que la justícia espanhòla aguèsse condemnat ièr meteis lo president de la Generalitat de Catalonha en foncions a un an e mièg d’inelegibilitat. De l’autre, exigissián que la Comission Europèa faguèsse quicòm. “Justícia en Euròpa, injustícia dins l’estat espanhòl”, çò disián. 
 



abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
4.

Per Nadal voli felicitar al president del Parlament Europeu e tots vosaltres, amb una cançoneta d'En Bernart de Ventadorn de fa uns 872 ans aproximadament:

Quan l'erba fresch'e e la folha par
e flors vos botonon el verjan,
e'l rossinhol autet e clar
leva sa votz e mou son chan, (chant)
joi ai de lui, e joi ai de la flor
e joi ai de me e de midon major;
Daus totas parts sui de joi claus e sens,
mas sel es joi qui tots autres jois vens.

  • 0
  • 0
francesc Palma
3.

Lo tribunal supren fins ara feia lo que li deia Mariano Rajoi e lo PP, enviar las policias a pegar als votants del referendum, las deetencions,lo judici, las condemnas. Ara cal que surtin tots los presos politics catalans e non catalans. I a a las presos espanholas personas per aver unicament participat a manifestacion. Es pas res de constitucional, es lo merder que faguet lo pp durant los darriers ans amb sa politica

  • 1
  • 0
Albèrt Ugou-Puechsarrat
2.

Bona noticia per Puigdemont. Per contra, cambiarà pas res per Jonqueras per çò qie foguèt jutjat abans l'eleccion a las eurodiputacions. Es pas mai en preventiva, foguèt condemnat. .

  • 0
  • 2
Pitaluga
1.

Es çò que disiái: la Comission, en fasent la Ponce Pilatas se ramba del costat de l’espanholisme mai ranci.
Pas qu’una responsa:

Segadors, esmoleu l’eina i bon cop de falç!

  • 11
  • 0

Escriu un comentari sus aqueste article