Bandièra01 capçalera  1180x150: Botiga

Actualitats

Cantarem lo XIII!

2020 comença e esperarem fòrça 40-20 per favorizar los moviments ofensius dels jogaires de rugbi de XIII!

Los vòts de la Super-Liga: l’Òme-Nadal marca l’ensag!
Los vòts de la Super-Liga: l’Òme-Nadal marca l’ensag!
La tribuna novèla
 
La dimenjada de represa del campionat d’Elèit 1 serà marcada pel rendètz-vos bèl de Lesinhan per celebrar la dobertura de la tribuna novèla, bastida aprèp l’incendi de julhet de 2018 que redusiguèt en cendres l’edifici centenari. Atal, aqueste dimenge 5 de genièr, al Molin, de matin, se poirà seguir un entraïnament dels Dragons Catalans, abans un dinnar de primièra (se marcar al prèp del secretariat de l’FCL: +33(0)4 68 27 00 70; lezignan13@orang... ) abans los dos rescontres juniors e Elèit 1 entre los locals e Limós. De notar que l’entrada a l’estadi serà a res-non-còsta.
 
Al programa de la jornada, se jogaràn tanben: Tolosa-Carcassona, Albi-Dragonets, Vilanòva-Palau e Sent Gaudenç-Avinhon.
 
 
Solidaritat
 
Lo jogaire neozelandés Sonny Bill Williams que prepara son retorn al XIII dins la formacion de Toronto a exprimit sa solidaritat amb lo pòble oigor, victima de la repression chinesa.
 
 
Cantata pels Canaris
 
Farem lo pont entre 2019 e 2020 amb lo tèxte d’aquesta “cantata” en l’onor de Carcassona 13.
 
1. Plan escalfurats, dintrarem a fons dins lo match
2. Al còp de pè d’entama, recuperarem la pauma
3. Dobertura, mesclanha, fasèm pas las causas a mièjas
4. Numèro 1, l’arrièr, sul balon totjorn primièr
5. De Trivala a Grasalhas, de Ciutat als Capucins,
 
Del Viguièr a Ozanam, sèm totes canaris
 
6. Tampon e caramèl, avèm defensa de fèrre
7. De mesclanha en tengut, de tengut en mesclanha, tojorn corrís lo talonaire
8. La linha dreita es lo camin del pilar
9. Aicí, es pas coma a l’escòla: al centre, podèm redoblar
10. Aicí, a l’ala, la linha de tòca, mon enemiga; la linha d’ensag, mon amiga
11. Lo segonda-linha tamparà o farà lo trauc
12. Amb lo n° 13, soi lo ligam arrièrs-davants
13. Quand nos levarem del banc, portarem tot nòstre vam.
14. Avèm mancat quicòm, sèm sortits del plan de jòc : brama l’entraïnaire
15. Qun Sanctus, fau lo Jèsus, un còp d’esponga, un còp d’aiga e sèm tornamai sus pè
16. Òu, l’arbitre, pòdes totjorn fiular: es nosaus que ganharem
17. Còp de pè a seguir, liberacion de pauma: avèm puntat l’ensag
18. L’ensag es marcat, lo tipe de la sòno manda una musica bèla. Ensag per Carcassona
19. Ensacat, encapat, lo còp de pè es passat
20. E lo tombat, d’un sol punt, nos pòt balhar la victòria
21. De Trivala a Grasalhas, de Ciutat als Capucins,
 
Del Viguièr a Ozanam, sèm totes canaris
 
22. Avèm ganhat: lo president es content e se met en quatre.
23. Direccion: lo vestiari. Passarem jos la docha per nos desfangar e començarem de recuperar.
24. La victòria es bèla: beurem dins la Copa.
25. La victòria es bèla: soslevarem lo bloquièr. Òc, mai fòrts que las tors de Ciutat, lo ganharem lo campionat.
26. Crentam ni cèrç ni marin e totjorn sostenèm los Canaris
27. A la pausa, a la fin, passarem a l’estanquet
28. Jol tibanèl, refarem la partida e la ganharem. Beurem e manjarem los afogassets dels Gaujoses Canaris.
29. Carcassona a ganhat: la setmana serà gaujosa.
30. Carcassona a perdut: tota la setmana, serem morruts, mas lo còp que ven…
31. Arribèri d’ora, cal pas mancar la partida dels juniors en dobertura.
32. Ai crompat doas bilhetas de la borricha: cal plan ajudar los joves
33. Aqueste còp, ai ganhat lo cambajon, doas cantinas e una pizza grandarassa
34. S’ai una empacha, escotarai lo Danís sus Marselheta o gaitarai la partida sul Morre-de-Boc, mas res non val d’anar a l’estadi.
35. Dins lo cèl, la Luna e lo Solelh son ovals
36. Òc, Luna e Solelh ovals: avèm d’estelas dins los uèlhs
37. E l’estatua de Pipeta voldriá plan córrer sus l’erbeta
38. De Trivala a Grasalhas, de Ciutat als Capucins,
 
Del Viguièr a Ozanam, Canaris totjorn! Lo XIII, aquò òc!
 

Aqueste tèxte a servit de basa a l’escritura per Cristian Almerge de la cançon: TotesCanaris.
 
Quand arribam sus la pelena
Avèm paur de digús
Sèm los gladiators del rugbi
Volèm ganhar, pas pus 
 
Endavant cap a la victòria
La forma es fòrça bona
De segur traparem la glòria
Sèm los de Carcassona
 
Sabèm plan que son pas nascuts 
Los que nos faràn cuèire
Que sèm Canaris plan nharruts
A la victòria nos cal creire
 
Refranh: Los Canaris de Carcassona
Son totjorn prèsts quand l’ora sona
Mai fòrts que las tors de Ciutat
Ganharem lo campionat
 
De la Trivala a Grasalhas
De Ciutat als Capucins
E del Viguièr a Ozanam
Totis sèm Canaris
 
Dins cada estadi lucharem
Farem viure la pauma
La Fòrça sia ambe nosaus    
Pintrarem tot de negre e jaune
 
Lo XIII, aquò òc!
Canaris per totjorn!
Lo XIII, aquò òc!
Canaris per totjorn!


 
D’escotar:

 
 
 
 
Alan Roch

 
 
 
 
 
abonar los amics de Jornalet
 
 
Lo programa de la jornada del dimenge 5 de genièr a Lesinhan de Corbièras
Lo programa de la jornada del dimenge 5 de genièr a Lesinhan de Corbièras

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article