Bandièra01 1180x150: País Invisible

Actualitats

Bagdad: los Estats Units an atacat amb dos missils l’aeropòrt e tuat lo general iranian Qasem Soleimani

Iran a promés un “revenge grèu” contra los Estats Units e a qualificat l’atemptat d’”acte coard”

Lo general iranian Qasem Soleimani, cap de la Fòrça Quds de la Gàrdia Revolucionària d’Iran, e lo soscap de la coalicion de milícias majoritàriament shiitas iraquianas Unitats de Mobilizacion Populara, Abu Mahdí Al Muhandis, son estats assassinats aqueste divendres amb de missils a l’aeropòrt internacional de Bagdad. Los Estats Units an revendicat l’atemptat, segon un comunicat oficial qu’assegura que lo quite president, Donald Trump, a ordenat l’ataca amb la tòca de “dissuadir” Iran. Qualques oras après l’ataca, l’ambaissada dels Estats Units a Bagdad demandèt a totes los ciutadans estatsunidencs que quitèsson l’Iraq.
 
Dimars passat, de milièrs de manifestants ensagèron d’intrar dins l’ambaissada dels Estats Units en Iraq per protestar contra las darrièras atacas aerianas qu’a patidas la milícia shiita prò-iraniana dicha Movement de Resisténcia Islamica d’Iraq e tanben coneguda coma Kataeb Hezbollah o l’Hezbollah iraquian. Sul pic, Donald Trump prometèt un revenge del temps qu’acusava Iran de promòure la manifestacion.
 
Lo cap suprèm d’Iran, l’aiatollà Ali Khamenei, a menaçat los Estats Units d’un “revenge grèu” per l’assassinat del general Soleimani e a decretat tres jorns de dòl oficial. D’autra caire, lo president iranian, Hassan Rohani, a condemnat la mòrt del general e a dich qu’aquel “acte coard es un signe mai de la frustracion d’America e de son impoténcia sus la region”. Après l’agression, lo ministre dels Afars estrangièrs d’Iran, Mohammad Javad Zarif, aviá dich que l’ataca dels Estats Units implicava una “escalada estupida” e qu’èra “extrèmament perilhosa” perque èra dirigida contra “la fòrça mai eficaça que lucha contra l’Estat Islamic, lo Front Al Nursa e e Al Qaida”.
 
Segon la cadena de television Al Arabiya, lo bilanç de l’assaut es d’almens sèt personas tuadas, dont quatre ciutadans iraquians e tres libaneses. L’aeropòrt de Bagdad es ara barrat e an interromput la circulacion aeriana dins la capitala iraquiana. Lo Centre d’Informacion de Seguretat d’Iraq a dich dins un comunicat que los missils tombèron près de la sala de carga en incendiar dos veïculs.
 
D’autre latz, la cadena de television Al Sumaria a raportat que demest las personas nafradas i a dos soldats, e a precisat qu’”un dels missils es tombat près d’una bastissa de las fòrças de la coalicion internacionala”.
 
 
 
 
abonar los amics de Jornalet
 
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Los ianquis fan atacs terroristas e ja tenen preparada l'excusa: que'ls iranians volian atacar als ianquis. E quan los altras los contestan disen qu' els non, los altreas son los terroristas. S'a vist ara que los terroristas son eles.

  • 2
  • 0

Escriu un comentari sus aqueste article