Charlotte Arnal, una femna d’Ais de Provença, a enrejat una marcha dempuei lo 9 d’octòbre de 2019 per sensibilizar a la question animala e aus drechs daus animaus dins la societat. Partiguet de Montpelhier e, dempuei, percor los país a pè de ciutat en ciutat: prumier en Occitània (Tolosa, Bordeu, Lemòtges, Clarmont) puei Arpitània (Lion), Alsàcia (Estrasborg) e enfin França per una ‘ribada au 9 d’octòbre 2020 a París, emb de las estapas mai o mens lonjas segon los luòcs, per ben dire 200 estapas en tot entre auberjaments e bivacs. A reüssit a ‘massar lo sosten d’un bon pauc de seguidors sus la pagina Facebook de son percors. Aitanben, a creat un sit web que respond a totas las questions sus son engatjament.
 
 
Quinze jorns a Lemòtges
 
Charlotte es aura ‘ribada a Lemòtges onte passa una quinzena de jornadas. Tascha mejan de rescontrar un pauc pertot los elegits, los representants locaus dau monde agricòla, los mèdias e d’organizar emb los militants locaus daus eveniments per far conéisser la causa que, dempuei quauquas annadas fròtja regde en interès sens que l’i àia pasmens tant de progrès dins los mausuenhs impausats a las bèstias. Charlotte Arnal es plan dins una amira de dialòg emb lo monde rurau, l’interessa fòrça de discutir emb la gent per la campanha que viven de près o de luenh de l’expleita daus animaus (elevaires, emplejats de tuadors, maseliers, representants sindicaus…) per compréner e enginjar pertot de las reflexions sus lo melhorament de las condicions de vita de las bèstias e lo respiech de lor condicion d’èsser sensible. A Lemòtges, rescontret fai quauques jorns lo renommat professor de drech privat Jean-Pierre Marguenaud qu’interven dins lo DU de drech animalier de l’Universitat de Lemòtges, a Briva. L’engatjament de Charlotte s’apieja tant sus los aspects politics coma scientifics o etics.
 
 
Ecofeminisme
 
La pensada de Charlotte es especialament inspirada de la filosofia de Jeremy Bentham e Tom Regan daus drechs daus animaus. Per Charlotte, “la compassion se ‘resta pas a la termiera de nòstra espécia, pas mai a la de nòstra ‘sieta”, per zo dire clar “los animaus son pas de las chausas”. “Pertant, la lei autoriza de las situations inacceptablas, totalament indignas de nòstra umanitat. Qu’es per aquò que 77% daus ciutadans e ciutadanas francesas son favorablas a çò que l’estat francés fase marcar dins sa Constitucion l’aparament daus animaus (IFOP 2018)”.
 
La lucha de Charlotte s’inscriu tanben dins una amira de convergéncia emb la lucha contra las violéncias fachas a las femnas en segre lo constat que son sovent las femnas que son mai presentas dins la causa animala e que menan la lucha tant per la question animala  coma per la condicion de las femnas dins la societat.
 
 
 
 
Joan-Cristòu Dourdet