Un estudi publicat dins la revista The Lancet HIV ven de confirmar la garison del VIU, lo virus de l’immunodeficiéncia umana que causa la sida, sul nomenat “pacient de Londres”. Seriá lo segond cas de l’istòria qu’una persona n’es completament garida. Lo sometèron a una transplantacion de cellulas socas e 29 meses puèi s’es pas detectat cap de replicacion del virus dins son organisme. La nòva es estada publicada en coincidint amb la conferéncia mondiala sus la malautiá, sonada Conferéncia dels Retrovirus e de Malautiás Oportunistas (CRMO). L’eveniment s'es tengut ongan virtualament a causa del coronavirus.
 
Dins l’eveniment an presentat encara un tresen cas de remission de long tèrme del VIU. Es lo dich “pacient de Düsseldorf” que catòrze meses après un ensèrt de la mesolha, l’òme a pas pus lo virus malgrat l’abséncia de medicacion antiretrovirala.
 
Los cercaires fan la diferéncia entre los concèptes de “garison” e de “remission de long tèrme” en foncion del temps qu’an passat los pacients sens replicacion del virus après l’acabada de la medicacion. Sembla que volian èsser prudents, mas ara an de rasons d’èsser optimistas.
 
Pels diches “pacient de Berlin” e “pacient de Londres” fa ja longtemps que lo virus s’es pas replicat malgrat aver quitat tota medicacion.
 
 
“Lo pacient de Londres”
 
Lo nomenat “pacient de Londres” èra un portaire del VIU que li detectèron un linfòma de Hodgkin. Per tant, en 2016 li faguèron un ensèrt de cellulas socas amb una mutacion qu’empediguèsse l’intrada del virus dins las cellulas tòcas del VIU. Setze meses puèi, los mètges interrompèron lo tractament antiretroviral e, en març de 2019, la revista Nature publicava l’article que demostrava que fasiá 18 meses que li detectavan pas pus lo virus dins lo sang. Veniá lo segon cas de “remission de long tèrme”.
 
Ara son ja passats 29 meses, e lo virus es totjorn indetectable dins lo sang, dins l’espèrma, dins lo liquid cerebrospinal e dins lo malhum intestinal.
 
Parièr que dins lo cas del “pacient de Berlin” se detectava sonque de fossils d’ADN viral sens capacitat infecciosa. Es a dire, de rèstas del virus trencat e desactivat.
 
Lo “pacient de Londres” si que presenta d’anticòrses contra lo VIU, mas seriá abitual que dins un organisme “persistiguèsson d’evidéncias d’una infeccion passada”.
 
 
“Lo pacient de Düsseldorf”
 
Quand al “pacient de Düsseldorf’ es un òme de 50 ans amb una infeccion pel VIU qu’en febrièr del 2013, recebèt una transplantacion de cellulas socas per tractar una leucemia mieloïda aguda. Las cellulas del donator avián tanben la mutacion que s’observèt dins l'ensèrt del “pacient de Londres”. En novembre del 2018, los mètges interrompèron sa medicacion antiretrovirala e, 14 meses puèi, lo virus s’es pas tornat replicar. Las analisis mòstran de tralhs d’ADN del virus, mas an pas tanpauc de capacitat infecciosa, valent a dire que son inactius. Segon los cercaires, aqueles resultats son “compatibles amb una remission sostenguda del VIU”. Se la situacion contunha atal, serà lèu lo tresen cas de garison del VIU dins lo Mond.

 
 

London patient becomes second to be cured of HIVhttps://t.co/0iqPb98VwDpic.twitter.com/Vvu9SaomyS

— News24 (@News24) March 11, 2020

 

London patient becomes second to be cured of HIVhttps://t.co/0iqPb98VwDpic.twitter.com/Vvu9SaomyS

— News24 (@News24) March 11, 2020

 
 

Third Dusseldorf patient may have been saved from HIV after undergoing stem cell transplant https://t.co/M6fz6N6VIJ

— Daily Mail Online (@MailOnline) March 7, 2019