Bandièra01 1180x150: La Passem

Actualitats

InternacionalPoliticaSocietat

Lèsbos: una enfantona mòrta dins l’incendi d’un centre de detencion de refugiats

MSF exigís l’evacuacion immediata del camp, que ten pas compte de las condicions sanitàrias, mai que mai fàcia a la pandemia del coronavirus

| @SEENOTRETTUNG
Una enfantona afgana de sièis ans moriguèt diluns dins un incendi al centre de detencion de refugiats de l’illa grèga de Lèsbos. Una mòrt trista e tragica que nos remembra la situacion de manca de dreches umans a las frontièras de l’UE. Lo fuòc dins aquel centre de detencion poiriá aver tuat mai de mond encara. Es un sit pensat per 3000 personas e n’aculhís 19 000. Mètges Sens Frontièras (MSF) exigís l’evacuacion immediata del camp, que ten pas compte de las condicions sanitàrias, mai que mai fàcia a la pandemia del coronavirus qu’Euròpa n’es venguda son fogal principal.
 
 
“Venguèt aicí per se salvar la vida e ara es mòrta”
 
A prepaus d’aquela tragèdia, lo jornal catalan Ara publica lo testimoniatge esglasiant d’Aghagol Walizadeh, una refugiada afgana que se tròba sul sit dempuèi setembre passat. Walizade parlèt amb lo mèdia per telefòn: “Aquela enfantona venguèt aicí per se salvar la vida e ara es mòrta cremada amb totas sas esperanças. Arribarà pas d’èsser engenhaira, o metgessa, o qué que volguèsse èsser”, çò diguèt.
 
 
“Morir es 100 còps melhor que demorar a Mòria”
 
En mai d’aquò, Walizadeh rapòrta una situacion òrra. “Fugissèm la guèrra e rescontram aicí una situacion terribla: de pelejas d’òmes ebris, de faissistas que nos baton, una manca d’aiga e electricitat, d’incendis... e ara lo coronavirus. Morir es 100 còps melhor que demorar a Mòria. Ara podèm pas pus sortir quitament pas per cercar de manjar perque nos ataca quitament la polícia. Sabiam pas qu’èsser refugiat èra un crim tan òrre. Volèm solament que nos tracten coma d’èssers umans”.
 
 
Acarniment de Grècia suls refugiats
 
L’acarniment de Grècia suls refugiats qu’ensajan d’aténher l’UE a travèrs del país ellèn es terrible, coma o raportèt lo jornalista Oriol Bäbler dins Vilaweb. Los vidèos qu’arriban mòstran d’accions injustificablas de la polícia e de l’armada, de vaissèls de la gàrdia costièra a tirar sus de barcas totas plenas de mond, d’ultradrechistas a tabasar de personas que fugisson una guèrra crusèla.
Mentretant, l’Union Europèa aficha son sosten a Grècia per evitar una nòva crisi migratòria, malgrat las esfraiosas e polemicas decisions del govèrn grèc per arrestar l’intrada dels refugiats amb d’atacas de la polícia e de l’armada contra aquelas personas.

 
 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article