Bandièra01 1180x150: La Passem

Actualitats

Internacional

Guayaquil empedís l’aterratge d’un avion sortit de Madrid

La consolessa màger de la vila ditz que vòl pas metre en perilh d’infeccion la vila ni mai los emplegats de l’aeropòrt

La consolessa màger de Guayaquil (en Eqüator), Cynthia Viteri, empachèt qu’un avion sortit de Madrid aterrèsse sus l’aeropòrt d’aquela vila dimècres passat. D’efièch, Viteri ordenèt que los emplegats de l’aeropòrt e d’agents de la polícia placèsson de veituras sus la pista d’aterratge per evitar que l’avion se pausèsse. Fin finala, l’aparelh volèt fins a Quito, ont si que poguèt aterrar. Pasmens, l’esquipatge i desbarquèt pas, mas prenguèt a bòrd los espanhòls de la vila e tornèt en Espanha.
 
“Cossí es possible que volguèsson permetre qu’aterrèsse uèi un avion de Madrid amb onze membres de l’esquipatge per qu’i demorèsson fins a divendres, amb lo risc de nòus cases de coronavirus? Aquò, malastrosament, es criminal”, çò manifestèt Viteri dins una conferéncia de premsa virtuala.
 
Pus tard, un autre avion sortit aqueste còp dels Païsses Basses foguèt tanben desviat devèrs Quito. Los dos avions transportavan solament de membres de l’esquipatge e lor tòca èra de repatriar de ciutadans d’aqueles païses que se trobavan en Eqüator, un país qu’a barrat sas frontièras a causa de la pandemia del coronavirus. La vila de Guayaquil permet solament l’arribada e la partença de vòls de cargament e d’urgéncia.
 
La consolessa màger de Guayaquil fa partida de l’oposicion al president drechista Lenín Moreno. Es benlèu per aquela rason que lo ministèri public a entamenat una enquista contra l’elegida.
 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Madrid tot sol té mai de la mitat dels afectats de tot l'Estat. Mas lo Govern Central no compren que seria melhor aplicar las mesuras de seguretat per autonomias qu' aplicar las de Madrid per tot l'Estat. La sanitat de Madrid el PP la volguet privatizar, mas finalment a base de retalhadas a quedat aiçò. La comunitat amb mai infectats, qu'ela soleta ne ten mai que totas las altras juntas. Un desastre voler retalhar la sanitat, es coma voler retalhar la salut.

  • 1
  • 0

Escriu un comentari sus aqueste article