Dins aqueste temps d’embarrament a l’ostal, una bona idèa per passar lo temps en occitan es la television, mai que mai s’avèm de connexion a Internet. Dins aquel sens, Òc Tèle prepausa, al delà de sa programacion abituala, dos documentaris fòrça interessants, un suls locutors de la lenga fiulada de la Val d’Aussau e un autre entitolat Gascogne que prepausa una adaptacion en filme de tres contes de Joan Francés Blader e Felix Arnaudin.
 
De mençonar tanben Tè Vé Òc, que prepausa cada setmana una emission en occitan sus d’aspèctes de la vida del país. Las emissions de Tè Vé Òc se publican cada dimècres sul sit www.teveoc.com e cada dijòus sus la seccion vidèo de Jornalet.
 
De soslinhar tanben que la Corporacion Catalana de Mèdias Audiovisuals (CCMA) prepausa fòrça programacion en occitan aranés, dont un bulletin informatiu jornadièr per tota Catalonha, d’emissions de ràdio e de television per Aran e d’emissions infantilas. O podètz trobar tot sus: www.ccma.cat/aranes.
 
 
Se clava Viure al País e #aranésòc
 
Ça que la, las emissions en occitan de France 3 e de Betevé se clavan tant que durarà lo confinament. Tant la cadena publica francesa coma la municipala de Barcelona priorizan los programas informatius a prepaus del coronavirus e barran lors installacions a tot lo personal non consagrat a aquelas emissions d’informacion.
 
France 3 tampa totes los magazines, e per tant sa programacion en occitan tanben. Del meteis biais, Betevé arrèsta totes sos programas franc dels informatius e, doncas, tanben l’#aranésòc.
 
La còla de VAP prepausa d’alternativas
 
Pasmens, la còla de Viure al País contunha d’alimentar de temps en quora son blòg per porgir malgrat tot d’informacions en occitan “puèi que sabèm que «la fe sens òbra, mòrta es»“, çò dison dins un comunicat.
 
Aquí, dins aquel blòg, se pòt trobar l’integralitat de las sèrias Biais o Còp d’Ala e las cronicas Lo Mot, totas produchas per Piget demest d’autras emissions e reportatges.

 
 
 
 

 

fffff		fffff
	Lo confinament dels legeires de Jornalet   Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.   As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?   Manda tos documents a info@jornale...   Convivéncia e paratge en confinament