Carcassona e Lesinhan avián rendètz-vos aqueste dissabte 27 d’abril a Brutus per la finala de la Copa Lòrd Derby.

Lesinhan dobrissiá la marca mercé a una penalitat. La defensa carcassonesa se mostrava plan organizada e contrava la dominacion de Lesinhan. Vincenç Albèrt profeitava de la pression dels davants per marcar. Puèi, per dos còps, Lucàs Albèrt fasiá mina de passar la palma abans de traucar la defensa verd e blanc. Clamenç Herrero ajustava doas transformacions. 16-2 a la pausa pels Canaris.

Los Jaune e Negre confirmavan tre le represa mercé a un ensag del capitani Escamilla qu’Herrero transformava. Amb l’avantatge del vent, Carcassona remandava los Verd e Blanc dins lor camp. Sol, Jordan Flovie pervenguèt a trapar lo trauc. Mas èra insufisent. Amb una victòria 22-6, la Copa demorava al pè de Ciutat.

De matin, a Pià, pel compte de la Copa dels U15, lo XIII Catalan batiá l’Academy de Carcassona 20-12 e, cò dels U17, Lesinhan dominava Albi 22-16.

De vèspre, a Brutus, las Divessas Catalanas batián les Beglesas 24-4 e, mercé a un tombat en fin de partida, lo Tolosa Olimpic metiá fin a l’invincibilitat de l’an dels catalans: 25-24, e servava la Copa Nitard.

La Copa de las esquipas de Nacionala veirà una finala Pàmias-Salses.

Barratges en campionat

Aquesta dimenjada, se jogaràn las partidas de barratge del campionat. Dissabte, Limós reçauprà los Dragonets. Los ganhants rescontraràn Albi en mièja finala lo dissabte 11 de mai.

Dimenge, Pià e Lesihnan se disputaràn lo dreit d’anar afrontar Carcassona lo dimenge 12 de mai a Domèc.

Dissabte, a 4 oras del vèspre, a Lesinhan, los Lops de Vilafranca voldràn acabar la sason sens desfaita fàcia a Vilagalhenc-Argon en finala del campionat d’Elèit 2.

Superliga: los primadièrs en dificultat

Aquesta novena jornada de Superliga foguèt de mal engolir per las formacions de cap de classament.

Dijòus, mercé a un tombat en fin de partida, St Helens se’n sortiguèt fàcia a Huddersfield: 13-12. Divendres, Wigan plegava cò d’Hull KR: 10-26. Los Dragons Catalans, en rason de suspensions e nafraduras, presentèron a Leigh una formacion que mancava de ligams e d’omogeneïtat. Sancion sens apèl: desfaita 2-30.

Dissabte, èra al torn de Warrington de pèrdre cò de Salford 12-17.

Los Sang e Aur tornan prene los aires cap a Anglatèrra per rescontrar Wigan tre aqueste dijòus de ser.

En Championship, cò del cap de fila Wakefield, lo Tolosa Olimpic tenguèt còp dins lo primièr temps abans de plegar 12-28. Novèl deplaçament aqueste dissabte 4 de mai del costat de Dewsbury.

Las partidas qualificativas per la Copa del Mond femenina an vist la victòria de las neerlandesas en Itàlia 56-5 e de las galesas fàcia a las irlandesas: 28-10.

NRL: lo dijòus es carton!

Doas partidas NRL de dijòus s’acabèron sus de marcas bèlas: los Polets anèron ganhar cò dels Dragons 60-18 e Melbourne dominèt los Lapinons: 54-20, alara que los Titans signavan lor primièra victòria de la sason en Nòva Zelanda: 27-24.

Divendres, Manly batiá Parramatta: 32-18. Dissabte, victòrias al defòra pels Cavals Fòls cò dels Tigres 34-16 e de las Pantèras cò dels Vaquièrs: 26-20.

Dimenge, Newcastle anava batre los Dalfins 18-14 e las Làmias confirmavan lor primièra plaça al classament amb una larga victòria a Canberra: 40-0.