La Comission Europèa prepausa un fons comun de caumatge de cort tèrme especialament destinat als estats pus afectats per la pandemia de Covid-19, Itàlia e Espanha. La presidenta de l’executiu europèu, Ursula von der Leyen, a anonciat la creacion d’un nòu esplech que visa que los salariats pòscan contunhar “de pagar lo loguièr e de crompar çò qu’auràn de besonh”. La mesura vòl evitar los licenciaments coma consequéncia de l’efièch sus l’economia de las mesuras restrictivas decretadas pels govèrns per arrestar l’expansion de la pandemia, e a per tòca de tornar metre en marcha l’economia “immediatament” tre la fin de la crisi.
 
“Las entrepresas poiràn contunhar d’aver lors emplegats, e mai se i a mens de trabalh. Dins los moments liures, los salariats poiràn aquerir de nòvas competéncias, çò que beneficiarà tant a l’entrepresa coma als obrièrs”, çò a explicat Von der Leyen.
 
“Los emplegats poiràn tornar al trabalh tanlèu que lo confinament serà acabat e quand la demanda tornarà remontar. Aquò es crucial per recomençar l’engenhariá economica sul pic”, çò a apondut la presidenta de la Comission, qu’a soslinhat qu’“an apresas las leiçons de la crisi financièra de 2008”.