La polícia espanhòla metèt en gàrdia a vista un entrepreneire ostalièr de Compostèla (Galícia) pel panatòri de gaireben dos milions de mascas e de material sanitari qu’aurián una valor d’aperaquí cinc milions d’èuros.
 
Lo raubaire s’èra assabentat qu’una societat consagrada a la venda de material sanitari se trobava en quincanèla, e que son bastiment industrial èra barrat amb tot lo material dedins. Après aver localizat un crompaire en Portugal, l’òme rompèt lo pan de la pòrta e tirèt las mascas dels embalatges per n’amagar l’origina. Es atal que la polícia a trobat tot lo material escampilhat dins lo sit. Mas an sonque trobat lo material que demorava, environ mila mascas. Las autras lo panaire reüssiguèt a las vendre.
 
Lo panatòri se debanèt en febrièr passat, en plena pandemia de Covid-19, e doncas la polícia remarca que lo malfactor “èra de tot en tot conscient que s’agissiá d’un material fòrça necessari per la lucha contra la malautiá e que començava d’èsser escàs al mercat”. De soslinhar que dins l’estat espanhòl las mascas son fòrça raras e qu’es complicat de ne trobar quitament pel personal de santat.
 
Lo detengut foguèt tornarmai mes en libertat dissabte passat après aver facha sa declaracion davant lo jutge, que l’acusa d’un delicte de “vòl amb violéncia”.
 
 

Deteñen un empresario de Santiago polo #Roubo de dous millóns de #Máscaras| SANTIAGO> O material sanitario como #Máscaras ou #Luvas converteuse nestes ...#Alerta_Sanitaria#Estado_De_Alarma#Galicia#Material_Sanitario#Santiago_De_Compostelahttps://t.co/M0Yzj9Ib2npic.twitter.com/a6ojxCB5C9

— Canal Rias Baixas (@canalriasbaixas) April 6, 2020