Picar e picar enqüèra vedi càder la caucia a còps a beth tròç e a còps sonque quauques grans com ploja de sable que s’envòla dens l’ostau e mia aulors e sentits deu passat.
 
Assagi de seguir la direccion de l’espiar, passi òras lentament, minuciosament, doçament a levar las capas a l’entorn de l’uelh dubèrt qu’espia la pòrta.
 
Aluqui un huèc dens la chaminèia per m’adromir lèu e de tant aver picat, sauneis extranhs me venen:
 
En purmèr vedi ua color, aquera color roja de la flor, puish vedi la dauna que la ten.
 
Se vira de cap a jo e ditz atau:
 
            “Eth, entrè dens mon còr per la pòrta deus sauneis
             E entrè dens mon sauneis per la pòrta deu còr
                       Manda-li mon messatge”
 
Me desvelhi capvirada au sorelh pascau e suu pic pensi a la flor puish comenci de me soviéner deu men saunei e de las paraulas de la dauna. Me parlava …
 
Torni picar, piqui au ras de la pòrta dens la direccion de l’espiar, vedi pèiras mei talhadas mei gròssas tanben. De reemplec benlèu son, ua mei petita que sembla un camin…
 
Contunhi, e vedi un aute dessenh aparéisher: ua ala o lo cap d’ua ala e dejós un vèrs:
 
“E adès serà l’alba”.
 


M. Delaprada
 
 
 
 
 

fffff		fffff
	Cronicas de l'embarrament A l’iniciativa de sos legeires, Jornalet prepausa de mandar regularament la cronica d’un embarrament. Aquela cronica pòt èsser ficcionala o a mièjas reala, mas es una convidacion a un exercici literari. Daissatz  vòstra imaginacion s’exprimir en una lenga trabalhada, rafinada, afogada. I podètz apondre un imatge.   Los tèxtes seràn publicats regularament dins la seccion “Cronicas de l’embarrament”. Escrivètz a info@jornalet...