Bandièra01 1180x150: Comuna de Tolosa

Actualitats

Moisès Broggi, lo cirurgian umanista e independentista catalan, es mòrt dins sos 104 ans

Cal soslinhar la siá trajectòria coma cirurgian e umanista, e lo sieu engatjament per Catalonha

Lo Doctor Moisès Broggi moriguèt dimenge passat, lo 31 de decembre 2012, dins sos 104 ans. Foguèt cirurgian e un dels promotors de la bioetica en Catalonha. Foguèt tanben un defensor de l’independéncia de Catalonha, e dins los darrièrs ans aviá sostengut los movements civics e independentistas del país.


Broggi nasquèt a Barcelona lo 18 de mai de 1908. Foguèt cirurgian e contribuiguèt a la consolidacion de la medecina modèrna. Aguèt un ròtle fòrça important pendent la Guèrra d’Espanha (1936-1939), coma cap de la còla cirurgicala de las Brigadas Internacionalas. Après la guèrra, la dictatura li enebiguèt d’exercir. Ça que la, contunhèt d’èsser un referent de la cirurgia catalana dins l’espital de Vallcarca e dins l’Espital Clinic de Barcelona.
 
Foguèt un dels cirurgians mai prestigioses del país, mestièr qu’exerciguèt fins a sos ochanta ans. Broggi foguèt reconegut pels sieus estudis en anatomia cirurgicala e per èsser un dels promotors de la bioetica en Catalonha. Innovèt dins lo terren de la medecina e de la cirurgia amb l’estudi del tractament de las feridas e fracturas, e mai amb l’anestesia amb respiracion contarotlada, çò que permet de far de longas intervencions.
 
Foguèt reconegut internacionalament per la siá valor professionala e tanben coma umanista: foguèt fondador de la Societat Internacionala dels Mètges Contra la Guèrra Nucleara (IPPNW). Broggi e de mètges de tot lo Mond signèron un manifèst ont afirmavan que la corsa als armaments èra una foliá. Per aquel manifèst de 1982, l’IPPNW recebèt lo Prèmi Nobel de la Patz en 1985.
 
Pas gaire conegut pr’amor de la dictatura franquista, Broggi se faguèt conéisser aquestes darrièrs ans pel sieu engatjament politic e actiu e mai per sos libres e reflexions.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Bolineta Sant Salvaor de Tiniá
1.

Mercés a Jornalet de nos informar que conoishio degunament aquèl òme. Seriá belèu tantben interessant de presentar de temps en quora las figuras vivas de l'occitanisme.

  • 4
  • 0

Escriu un comentari sus aqueste article