De presonièrs politics de tot lo Mond, dont los catalans e Julian Assange demest d’autres, an enviat una letra a la Nauta Comissària de l’ÒNU pels Dreches Umans, Michelle Bachelet, en li demandant que sollicite dels estats que “salven las vidas” dels presonièrs en situacion de vulnerabilitat davant la pandemia de la Covid-19.
 
Bachelet aviá demandat que se protegiguèsse la santat de las personas que se tròban dins las presons, e justament la letra critica que “fòrça estats” escoten pas sas recomandacions, e qu’en consequéncia la santat e las vidas dels presonièrs sián expausadas a un “naut risc”.
 
Los presonièrs politics tanben planhon que la malautiá afècte de centres de retencion, en particular de migrants, mentre que Bachelet aviá demandat als govèrns la reduccion “urgenta” de la populacion penitenciària amb la tòca d’evitar “de consequéncias catastroficas”.
 
La letra la signan, demest d’autres, los presonièrs politics catalans Jordi Cuixart, president d’Òmnium; l’èx-president de l’ANC, Jordi Sánchez; los membres del govèrn de Puigdemont Raül Romeva, Joaquim Forn, Dolors Bassa, Oriol Junqueras, Josep Rull, Jordi Turull e la presidenta del parlament Carme Forcadell. La signan tanben lo fondador de Wikileaks, Julian Assange; la cap de l’organizacion Tupac Amaru d’Argentina, Milagro Sala; l’activista politic argentin Luís de Elía; lo cap social colombian Julián Andrés Gil Reyes; los activistas colombians Jose Vicente Murillo e Jorge Enrique Niño, entre d’autres. De soslinhar la signatura del defensor indigèna maia de Guatemala Bernardo Caal Xol o los defensors del drech de l’aiga e del territòri d’Honduras Jeremías Martínez, Porfirio Sorto Cedillo, Ewer Alexander Cedillo, José Daniel Márquez, Kelvin Romero, José Abelino Cedillo, Arnold Alemán Soriano e Orbin Hernández Hernández. Enfin, soscrivon tanben a la letra lo cap del movement popular del Rif Nasser Zefzafi, l’activista del Sahara Occidental Mahfouda Bamba Lefkir e lo jornalista saharaui Bachir Mahdar Khada.

 
 

fffff		fffff
	Lo tèxt de la letra   «Cara Dòna Bachelet, Nauta Comissària pels Dreches Umans de l’ÒNU,   En aquestes moments malaisits que los travèrsan los pòbles e las nacions del Mond, nos adreiçan a vos en nòstra condicion de presonièrs e de presonièrs politics, a prepaus de vòstras declaracions del 25 de març de 2020, ont demandèretz als govèrns que prenguèsson de mesuras urgentas per protegir la santat e la seguretat de las personas en preson o embarradas dins d’autras installacions, coma part dels esfòrces per frenar la pandemia de la Covid-19.   Coma o aviatz pronosticat dins aquelas declaracions, la pandemia afècta ja de presons, de centres de retencion de migrants e d’autres centres de detencion. Davant aquela situacion, vòstras recomandacions coma Nauta Comissària de las Nacions Unidas pels Dreches Umans foguèron fòrça claras, en encoratjant los govèrns a realizar una draconiana reduccion de la populacion penitenciària de manièra urgenta. Las personas vielhas, las personas malautas, “totas e caduna de las personas que son encarceradas sens pro de basa legala, compreses los presonièrs politics e d’autres detenguts per aver exprimit d’opinions criticas o dissidentas”, aital coma los presonièrs mens perilhoses, èra la populacion privada de libertat que vos convidèretz a desencarcerar prioritàriament amb la tòca d’evitar de consequéncias catastroficas.   Nos inquieta que fòrça estats escoten pas vostras recomandacions pr’amor que, coma o exprimiguèretz, manténer de presonièrs en detencion pendent aquela pandemia compòrta un naut risc per lors vida e santat, çò que deu pas èsser exclusivament una mesura de darrièr recors. La situacion es encara mai en inquietanta se prenèm en compte la manca d’igiène, de ressorsas sanitàrias e l’amolonament dins las presons e los centres de detencion de la màger part de nòstres païses. Las èrsas aumentan cada jorn dins las presons, e tanben lo nombre de mòrts, tant per la Covid-19 coma per la repression contra las protèstas que qualques presonièrs e presonièras an fachas en diferents centres de detencion e reclusion.   Coma presonièras e presonièrs politics coneissèm de primièra man la situacion de las presons dins nòstres païses respectius e volèm remarcar que la preocupacion qu’expausam pertòca pas exclusivament la situacion personala que vivèm, mas l’estendèm a la de las personas que se tròban a l’ora d’ara privadas de lor libertat. Es per aquela rason que nos adreiçam a vos per denonciar la violacion qu’observam, tant de las nòrmas internacionalas coma de las directivas e recomandacions que faguèretz coma Nauta Comissària de las Nacions Unidas pels Dreches Umans.   Sens cap d’autra pretension, vos mercejam de vòstra atencion e esperam que poscatz contunhar de menar las accions necessàrias per que los estats prengan las mesuras necessàrias per salvagardar la vida de lor populacion, compresa la dels presonièrs e de las presonièras que se tròban en aquestes moments en vulnerabilitat mai granda davant la Covid-19.»