Bandièra01 1180x150: Comuna de Tolosa

Actualitats

Occitània elegís uèi lo president de França

La màger part del territòri occitan participa a las presidencialas

| Tonio Vega

Uèi, 22 abril, se debana lo primièr torn de las eleccions presidencialas francesas e la màger part del territòri occitan i participa. Solament qualques endreches pichons del país (Mónegue, las Valadas, la Val d’Aran e La Gàrdia) demòran excluses de la votacion. Lo segond torn dels comicis aurà luòc, se cal, lo 6 de mai.


Segon totas las enquèstas solament Nicolas Sarkozy e François Hollande passaràn uèi lo taus necessari per accedir al segond torn. Coma d'abitud, es probable que França demòre commocionada per un resultat naut del Front National, çò que provocariá tornar-mai de rius de tencha e d'interminables debats televisius amb de sociològs e de politològs. Coma d'abitud tanplan, las esquèrras revolucionàrias faràn un resultat digne e, tanplan coma d'abitud, qualques unes dels candidats preferits per l’opinion publica, coma François Bayrou, veiràn pas aquel supòrt social revirat en un resultat electoral equitatiu.

Se las enquèstas se confirman e los candidats de l'UMP e del PS passan al segond torn, arribarem al 22 de mai après una dura campanha electorala. Serà quicòm mai qu'una batalha entre dos gigants de la politica, mas entre dos modèls de societat, de país, de sistèma economic e de modèl europèu. Pauques còps dins l'istòria electorala francesa dos candidats an agut de programas politics talament alonhats. 

Pasmens, los occitans avèm mai d'elements a pensar a l’ora de decidir lo nòstre vòte e de recebre l'influéncia dirècta de la gestion del futur president. Los abitants de las regions del sud de la Republica Francesa avèm los meteisses problèmas que los abitants del nòrd, e al delà ne cal apondre qualques unes de mai. En aquel sens, la politica lingüistica francesa (qu'e mai s'existís pas formalament, França n’aplica una de fòrça clara) es estat un dels subjèctes qu'a agut una cèrta importància dins aquesta campanha. Totes los candidats presidencials an mostrat lo lor vejaire e aqueste còp sabèm que França ratificarà la Carta Europèa de las Lengas Regionalas e Minoritàrias e que desvoloparà l’ensenhament bilingüe dins las escòlas dins lo cas que ganhen François Hollande, François Bayrou, Eva Joly o Philippe Poutou. Per contra, los autres candidats se son posicionats radicalament contra, qualques unes de faiçon plan viscerala.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Oton d'Aniòrt Aniòrt de País de Saut
3.

Es indicat dins l'article "Serà quicòm mai qu'una batalha entre dos gigants de la politica, mas entre dos modèls de societat, de país, de sistèma economic e de modèl europèu. Pauques còps dins l'istòria electorala francesa dos candidats an agut de programas politics talament alonhats." Tròbi l'autor d'aquestas linhas un pauc inatentiu o plan tròp optimista. L'UMP es capitalista. Ont avètz vist que lo PS èra anticapitalista ?

  • 1
  • 1
Mahmut
2.

Jo votaréi pas, purmèr per'mor aquera eleccion pren pas briga en compte la realitat occitana,
mes sustot per'mor lo sistèma presidenciau ei de natura anti democratica, que sia francés, occitan o javanés.

La democracia se dèu bastir per lo pòble, a partir deu pòble, e quitament una Occitània independenta seré pas legitima per diser a las populacions de Biarn, deu Pais Marselhés o de Sèta çò qu'ei ei bon tà d'eras.

  • 7
  • 4
Gèli Grande Lairac en Agenés
1.

Soi ciutadan francés de nacionalitat occitana non reconeguda. Auriai mai aimat votar per elegir lo President o lo Capiscòl d'una Republica Federala d'Occitània ... esperarai un pauc
Demest lo detzenat que se fan portar per governar l'empèri Francés sonque 3 m'an un pauc interessat.
Dauna Eva Joly a un paragrafe del seu paperòt titolat "Per una França de las Regions" qu'es plan interessant aquò se vei que los del Partit Occitan an butat per que i siaga. Seria pas estada assassinada pel seu "amics" ecologistas l'auriai votada ...

Philippe Poutou fa un poton a Corsega e als pòbles dels TOM e DOM los i concedis lo dreit de s'autodeterminar ... e las autras nacions colonisadas per França son pas dignas d'aquel onor ?

Lo paperòt del candidat Bayrou es mut sul sicut de las lengas ditas regionalas e soi estat un pauc decebut ... urosament que lo vegèri sus internet e que legiguèri La Setmana

Fin finala l'ai votat sens illusion

Gèli Grande

  • 5
  • 0

Escriu un comentari sus aqueste article