Bandièra01 capçalera  1180x150: Botiga

Actualitats

China cèrca de cancelar l’autonomia d’Hong Kong

Ven d’aprovar una nòva lei de seguretat qu’anullariá de facto lo sistèma local. L’oposicion democratica a reagit amb indignacion

China vol cancelar per la via dels faches l’autonomia d’Hong Kong amb la mesa en òbra d’una polemica lei de seguretat, anonciada aqueste divendres passat. La nòva lei ditz qu’enebirà “tot acte de traïson, secession, sedicion e subversion” contra lo govèrn chinés e tanben lo “panatòri de secrets d’estat e l’organizacion d’activitats a Hong Kong de part d’organizacions politicas estrangièras”. A mai, autoriza las fòrças de seguretat chinesas a agir dins lo territòri d’Hong Kong sens qu’o permeta lo govèrn autonòm de la vila.
 
 
Indignacion de l’oposicion democratica
 
L’oposicion democratica a reagit amb una granda indignacion. Al Conselh Legislatiu, lo parlament de la vila, los deputats democratas interrompèron la sesilha amb de bandeiròlas e protestèron contra la presidenta de la cambra, Starry Lee, que deguèt partir escortada.
 
Un dels representants del movement democratic, Lee Cheuk-Yan, exprimiguèt sa paur que lo govèrn pròchinés de la vila se servisquèsse desenant del concèpte de “subversion” per encarcerar los opausants. Dins aquel sens remembrèt qu’es per “subversion” que lo prèmi Nobel de la patz, Liu Xiaobo es condemnat a 11 ans de preson en China.
 
 
Sosten de Carrie Lam
 
La cap de l’executiu, Carrie Lam, èra a Pequin per participar al Congrès del Pòble, ont s’aprovèt la decision polemica. Tornada a Hong Kong, faguèt una conferéncia de premsa ont daissèt entreveire que lo Conselh Legislatiu de l’èx-colònia britanica adoptariá una lei pròpria que comprendriá las condicions requeridas per poder aplicar la lei aprovada a Pequin. Tanben diguèt que la sosteniá.
 
 
Reaccions internacionalas
 
Lo govèrn del Reialme Unit avertiguèt divendres a China que deviá respectar “los dreches e la libertat” de l’èx-colònia britanica. Lo trachat entre China e lo Reialme Unit establís un regim politic pròpri per Hong Kong, conegut jol concèpte “un país, dos sistèmas”.
 
Los ministres dels afars estrangièrs del Reialme Unit, de Canadà e d’Austràlia, Dominic Raab, François-Philippe Champagne e Marise Payne respectivament, an publicat un comunicat conjonch que recòrda al govèrn chinés que l’autonomia d’Hong Kong es considerada segon l’acòrdi internacional fins a l’an 2047 e que se pòt pas escafar unilateralament. Tanben l’Union Europèa e los Estats Units an menaçat China de sancions diplomaticas.
 
 
Casuda de la borsa
 
Una de las reaccions a la decision chinesa es estada la fòrta casuda de la borsa. L’indèx Hang Seng tombèt en fin de setmana passada de mai de cinc ponches, es la casuda pus fòrta dels darrièrs cinc ans. Totas las grandas societats d’Hong Kong an enregistrat de fòrtas pèrdas.
 
Fins ara, Hong Kong es tengut coma lo ponch clau d’escambi entre l’Occident e China, perque son sistèma judiciari donava de seguretat als investidors. Aquela seguretat demorariá fòrça tocada se s’aplica la pretension del govèrn chinés d’anullar per la via dels faches l’autonomia d’Hong Kong.


 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Mas si no mos o avian dit que tenien autonomia ! Ara resulta que tenen autonomia e an paur que se la prenguen. La premsa ionqui no mos o deia pas.

  • 1
  • 0
Black Blòc Joe
1.

China cèrca de cancelar l’autonomia de qui que siá, de qué que siá. China cèrca d'o contrarotlar tot, tostemps, pertot, e non pas "China", mas pro especificament l'actual governament chinés. Coma lo de França, non pòt sofrir ni tolerar la critica ni l'oposicion pus mendras, automaticament assimilada al caòs.

Aquò dit, l'autonomia d'Hong Kong es mai que tot neoliberala. Alavètz, entre la pèsta e lo colerà… paure monde que sèm !

  • 5
  • 0

Escriu un comentari sus aqueste article