Aperaquí 300 personas manifestèron dissabte passat a Baiona per exprimir lor solidaritat envèrs lo presonièr basco Patxi Ruiz, que se tròba en cauma de la fam dempuèi l’11 de mai passat. Mentretant, a Pau, un desenat de militants de Libertat se recampavan amb la meteissa revendicacion davant lo consolat d’Espanha. Los activistas bearneses exigiguèron “la fin de las persecucions que pateish de las parts de l’administracion penitenciària e l’apressada deus presoèrs e presoèras politic deu son lòc de residéncia”, çò rapòrta Occitània Arroja.
 
En Bascoat qualques centenats de personas manifestèron a Pampalona, en tot èsser atacats per la polícia.
 
Las revendicacions del presonièr caumaire, que se tròba dins una preson de Múrcia, a qualques 700 quilomètres de Pampalona, son de denonciar de maltractaments e de demandar que los presonièrs bascos sián encarcerats en Bascoat.
 
Un vintenat de presonièrs e èx-presonièrs politics, mai que mai bascos e catalans, se son tanben declarats en cauma de la fam en sosten amb las revendicacions de Ruiz.