Lo ministèri public (“parquet”) de París a dobèrt una enquista preliminara contra lo govèrn francés per la gestion sanitària del coronavirus 2019, çò rapòrta Le Monde. Es la seguida de la quarantena de denóncias recebudas pendent lo confinament que las an depausadas sustot de parents de victimas de la covid-19 e d’associacions professionalas. La majoritat d’aquelas denóncias pertòcan lo director general de la santat, Jérôme Salomon, lo sistèma de santat publica, l’administracion de las presons e lo Ministèri del Trabalh. L’enquista cèrca principalament los delictes de “mesa en perilh de la vida dels autres”, d’“omicidis e de nafraduras involontàrias” e de “non-assisténcia a persona en perilh”.
 
Lo president Emmanuel Macron, pr’amor de sa foncion e de la Constitucion, a l’immunitat e pòt pas èsser mes en examen. Totun, si que se pòt examinar los ministres e los nauts responsables del govèrn.
 
Ça que la, lo procuraire Rémy Heitz a explicat a France Press que la tòca es de verificar s’i a agut qualque delicte dels responsables governamentals, qu’en cas qu’existiscan d’infraccions penalas, es probable que sián involontàrias, e que se poirián punir solament en cas d’imprudéncias o de negligéncias demostradas.