Bandièra01 capçalera  1180x150: Botiga

Actualitats

L’activista Joshua Wong anóncia sa candidatura al parlament d’Hong Kong

A la fin de 2019, las autoritats de la vila enebiguèron sa candidatura a las eleccions localas

L’activista pròdemocracia hongkongués Joshua Wong a anonciat que se presentarà a las eleccions legislativas de la region que se faràn en setembre que ven. Wong a anonciat sa candidatura dins l’encastre de l’enòrma tension politica per l’aprobacion pel parlament chinés de la polemica lei de seguretat nacionala a Hong Kong, que dona a China lo poder total sus l’ex-colònia britanica; de fach, aquela lei anulla los acòrdis entre lo Reialme Unit e China qu’obligavan aquesta a respectar la libertat d’Hong Kong.
 
“Es ora que lo partit pròdemocracia obtenga la majoritat e siá pas menaçat per son efièch descoratjant”, çò a escrich Wong en referéncia als metòdes governamentals per descoratjar las revendicacions de dreches. A mai, a avertit qu’aqueste còp “la batalha deu èsser mai dura” perque, après l’aprobacion de la lei de seguretat, los candidats riscan pas solament “d’èsser desqualificats” mas i a la possibilitat que sián encarcerats dins una preson chinesa.
 
D’autre latz, Wong avisa que “lo govèrn d’Hong-Kong a ja establit l’encastre politic de las eleccions”, en luòc de manténer d’eleccions “liuras e justas”. “Demest lo centenat de pretèxtes per desqualificar ma candidatura, mon nom, Joshua Wong, n’es e serà totjorn la sola rason”, çò a dich. A la fin de 2019, las autoritats d’Hong Kong enebiguèron sa candidatura a las eleccions localas.
 
“Ai pas cap de pista sus ont serai d’aicí a tres meses, mas soi segur que nòstra determinacion serà un fòrt messatge al Mond que las gents d’Hong Kong se rendràn pas jamai malgrat la lei de seguretat nacionala”, çò a conclús.

 





 
 abonar los amics de Jornalet

 


 
 
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article