Bandièra01 capçalera  1180x150: Novestivada

Actualitats

Marròc: l’amazigh exclús de la nòva carta d’identitat malgrat son oficialitat

Lo govèrn invòca “de problèmas tecnics”

La lenga amazigh figurarà pas sus las nòvas cartas d’identitat de Marròc e mai siá lenga oficiala dempuèi 2011. La Cambra dels Representants del país nòrd-african a aprovat un projècte de lei qu’exclutz l’amazigh del document “per de problèmas tecnics”.
 
Aquesta es, almens, la rason que l’an invocada lo ministre de l’Interior e  los parlamentaris del Partit de la Justícia e del Desvolopament (PJD) e de l’Istiqlal, çò rapòrtan divèrses mèdias.
 
Per tant, las cartas d’identitat marroquinas contunharàn d’emplegar exclusivament l’arabi e lo francés, coma fins ara.
 
 
Discriminacion contra la lenga amazigh
 
Lo Congrès Mondial Amazigh a denonciat la decision coma una mòstra de “racisme d’Estat” contra lor pòble.
 
L’amazigh foguèt reconegut dins la Constitucion de Marròc coma lenga oficiala en 2011. Las organizacions amazighs ne critican l'aplicacion, que lor sembla tròp lenta. Calguèt, d'efièch, esperar fins en 2019 per que lo parlament de Marròc aprovèsse una lei per aplicar l’oficialitat de l’amazigh.
 
Aquela lei, justament, prevesiá l’introduccion de la lenga pròpria marroquina sus la carta d’identitat, mas amb un relambi de dètz ans, fins en 2029.
 
 
 
Aquesta nòva es adaptada de Nationalia amb qui Jornalet ten un acòrdi de cooperacion.
 
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article