Bandièra01 1180x150: La Passem

Actualitats

Internacional

Beirot: environ 300 000 personas an perdut lor lotjament

Espitals saturats, manca dels produches basics, de centenats de mòrts, de milièrs de nafrats, aument de las infeccions de covid-19... Liban afronta una crisi sens precedent

Dos jorns après las explosions que secotiguèron la vila de Beirot, lo bilanç es subrecatastrofic. Unas 300 000 personas an perdut lor lotjament, çò es un estatjant sus cinc. De mèdias locals evòcan una immensa solidaritat dels abitants qu’aculhisson dins lors ostals los qu’an perdut lo lor.
 
L’onda de chòc destruguèt un fum d’immòbles, e son encara a cercar de mond atrapat jos los tarcums. Se parla, per ara, de 135 mòrts e mai de 5000 nafrats. Aquela chifra, per malastre, serà probablament mai nauta.
 
 
Espitals saturats
 
Los espitals son saturats. Dins una situacion de nauta tension causada per la covid-19, se tròban amb mens de personal per afrontar aquesta crisi inedita.
 
 
Crisi sens precedent
 
Dins los darrièrs jorns a Beirot, las infeccions de la covid-19 avián crescut fins al ponch qu’èra previst que ièr comencèsse un nòu confinament. Per aquela rason demest d’autras, lo país se tròba dins una crisi economica sens precedent.
 
A mai, s’es cremat un dels depauses de pan pus importants del país e se prevei que pendent un mes i aurà pas res per poder elaborar aquela noiridura basica.
 
Cal prene en compte que l’80% dels produches basics per la subrevivéncia èran importats e arribavan en Liban via lo pòrt de Beirot, qu’ara es destruch.
 
Los abitants qu’an viscut d’autras guèrras rapòrtan als mèdias que jamai avián pas vist una situacion coma aquesta. Segon lo realizaire Philippe Aractingi, que visquèt la guèrra de 2006, alavetz “lor calguèt 30 jorns per provocar la meteissa destruccion que l’a facha ara una sola explosion”.
 
 
Divèrsas ipotèsis sus l’origina de las explosions
 
Segon las autoritats libanesas, las explosions las provoquèt un estòc de 2750 tonas de nitrat d’amòni que demoravan dins un magazin del pòrt sens mesuras de seguretat. Los foncionaris que susvelhavan aquel magazin son assignats a domicili mentre que se ten l’enquista.
 
Mas las autoritats an pas escartat d’autras ipotèsis. Uèi, la Cort Internacionala Especiala per Liban deu conclure qual son los responsables de l’atemptat contra l’èx-primièr ministre Rafiq Hariri, tuat en febrièr de 2005. Es probable que los jutges conclugan que lo tuèt l’Hezbollah. Per aquela rason, i a de mond que sospièchan que la poderosa milícia shiita libanesa aja una relacion amb las explosions.
 
L’estat d’Israèl s’es afanat a dire qu’a pas res a veire e mai a prepausat d’ajuda umanitària. Aquel estat es tecnicament en guèrra amb Liban e las tensions avián aumentat dins las darrièras setmanas.

   



 
 
 
 



abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Occitan dels bèls
1.

Aquò cal apondre en tot bèl porgiment al nom Sant d'Alibèrt, qu'aital e aital, causa dicha siá.

  • 0
  • 2

Escriu un comentari sus aqueste article