Bandièra01 capçalera  1180x150: Novestivada

Actualitats

Bielorussia: nuèch electorala de susmautas per de sospièchas de frauda electorala

Segon los primièrs resultats oficials, Lukashenko a atench l’80% dels vòtes del temps que l’opausanta Tikhanovskaia arriba pas al 10%

| EFE/EPA / Tatyana Zenkovich
La nuèch electorala de dimenge a diluns en Bielorussia s’acabèt amb de susmautas e afrontaments entre ciutadans e policièrs a causa de resultats que semblan una engana. Los primièrs resultats, d’efièch, atribuïsson l’80% dels vòtes a l’actual president Aleksandr Lukashenko, del temps que la principala opausanta, Svetlana Tikhanovskaia, arriba pas al 10%. Son de resultats preliminars —a l’espèra del comptatge del vòte exterior— fòrça similars als de fa quatre ans, e mai en aquesta escasença l’oposicion se siá fòrça mai mobilizada. Es per aquesta rason que pareisson de mal creire aqueles resultats que Tikhanovskaia accèpta pas. Lo bilanç de las susmautas es d’almens un ciutadan mòrt e de mai d’un centenat de nafrats.
 
De remarcar que tant la campanha coma la jornada electorala foguèron marcadas per una fòrta repression. Lo vòte se faguèt sens observaires internacionals amb l’enebicion d’una bona part dels mèdias estrangièrs.
 
Après lo barrament dels burèus de vòte e la difusion d’un sondatge oficialista qu’avançava un resultat que confirmariá diluns de matin, la polícia se despleguèt a Minsk, ont la molonada s’acampèt al centre de la capitala. Parièr se passèt dins d’autras vilas del país coma Gomel e Vitebsk. Los agents empleguèron de canons d’aiga, de balas de goma e de gases lacrimògens. Quitament i a d’imatges d’un camion de la polícia que se roncèt suls manifestants.
 
 
Qualques testimònis qualifican aquelas protèstas coma las pus importantas dempuèi la casuda de l’Union Sovietica, que foguèron ja precedidas per las grandas mobilizacions de campanha de Tikhanovskaia qu’a capitat a amassar fins a seissanta mila personas dins un parladís politic, una chifra que s’èra pas jamai vista en Bielorussia. Tikhanovskaia es la molhèr d’un dels caps de l’oposicion que Lukaishenko a encarcerats. Traductritz d’anglés, de trenta sèt ans, aquesta femna desconeguda pel grand public fa tres meses a reüssit a unir l’oposicion fragmentada a l’entorn d’una candidatura qu’a galvanizat lo país. Dimècres, lo cap de campanha de Tikhanovskaia foguèt arrestat per la polícia e s’anullèt una reünion de sosten a sa candidatura, jos l'escampa de la manca d’espacis disponibles.
 
 
Lo darrièr dels dictators europèus
 
Fidèl aliat del president de Russia, Vladimir Putin, e conegut coma lo darrièr dictator d’Euròpa, Lukaishenko ten lo poder dempuèi 1994. Pendent aqueles 26 ans a governat Bielorussia amb una man de fèrre, amb un contraròtle total dels mèdias e amb una fòrta repression de l’oposicion.
 
 
 
 
 
 
 
 
abonar los amics de Jornalet
 
 

 
| EFE/EPA / Tatyana Zenkovich

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

Pendent aqueles 26 ans a governat Bielorussia amb una man de fèrre, amb un contraròtle total dels mèdias e amb una fòrta repression de l’oposicion. Qui donc, lo neoliberalisme ? A non… Confondi amb la rèsta d'Euròpa…

  • 12
  • 8

Escriu un comentari sus aqueste article